Dymbilvika: Dymblarnir bíða þín á Byggðasafninu
Byggðasafnið okkar á þrjá dymbla. Dymbilvika stendur nú sem hæst og gaman að sýna börnunum við hvað hún er kennd. Byggðasafnið er opið laugardaginn 4. apríl.
Ævintýrin finnast á Byggðasafninu
Dymbilvikan er nú í fullum gangi. Byggðasafnið okkar á þrjá dymbla! Það er ólíkt flestum söfnum landsins, ef nokkru. En hvað er dymbill? Fréttastofa RÚV kom í heimsókn á Byggðasafnið í gær og kíkti á dymblana sem hafa verið í eigu safnsins í 40 ár.
Heiðrún Eva Konráðsdóttir, sérfræðingur hjá safninu, segir Kristínu Magnúsdóttur hafa gefið safninu dymblana þrjá árið 1986. Sá veglegasti, sem fékk athyglina í sjónvarpsfréttinum, hafi eins og hinir tveir komið frá kaþólsku kirkjunni í Hafnarfirði sem vígð var árið 1926.
Drymbillinn gefur rétta tóninn
„Dymbillinn hefur dökkan viðarlit og rennt handfang. Skaftið er um 16 cm langt og þverspýtan er um 30 cm,“ lýsir Heiðrún. Þegar dymblinum sé slengt til á vissan hátt gefi hamarinn mjög snögg og hávær högg þegar hann snerti þverfjölina. Hinir tveir í eigu safnsins séu minni og sá minnsti minni helst á skólaverkefni, léttur og brennt í hann skjaldarmerki. Dymblarnir tákni tímana sem fari í hönd innan kristinnar kirkju, píslargöngu krists. Hljómurinn holur í stað bjarts kirkjuklukknahjóms.
„Dymblarnir þrír verða til sýnis í safninu nú yfir páskana. Opið er á laugardag milli 11-17 ,“ segir hún.
Lesa má á Vísindavefnum. Þar segir að orðið dymbildagar finnist í rituðu máli frá því laust eftir 1300, en geti að sjálfsögðu verið mun eldra.
„Merkilegt er að það kemur ekki fyrir í íslenskum lögbókum, hvorki í Kristinna laga þætti Grágásar, sem var lögtekinn á Alþingi um 1130, né Kristinrétti hinum nýja (1275), og ekki heldur í Jónsbók (1281). Gæti það bent til þess að þetta hafi í upphafi verið alþýðuorð sem ekki komst í opinber skjöl fyrr en tiltölulega seint.“ Orðið dymbilvika sjáist ekki í íslensku fyrr en í kirkjuordinansíu Kristjáns 3. frá 1537, sem Gissur biskup Einarsson þýddi árið 1541.
Byggðasafnið fær reglulega gjafir
Heiðrún segir safninu reglulega berast gjafir, eins og þessa dymbla fyrir fjörutíu árum. Á þessu ári séu þær þegar orðnar tíu. Úr vöndu sé að ráða þegar safnið þiggi gjafir því þær séu aðeins þegnar tengist þær Hafnarfirði og séu ekki þegar til í safninu.
Heimsókn í Pakkhús byggðasafnsins er ævintýri. Þar má gægjast inn í margan tímann. Safnið er gullfallegt, troðfullt af minningum fortíðarinnar. Komdu í heimsókn.
- Opið laugardaginn 4. apríl milli kl. 11-17
- Sjá nánar á Vísindavefnum
- Sjáðu fréttina á RÚV