Fræðandi, hvetjandi, styðjandi og upplýst samfélag er málið!

Fræðslukvöld fyrir öll áhugasöm um kynheilbrigði og jafnrétti barna og ungmenna

Heilsubærinn Hafnarfjörður býður til fræðandi & hvetjandi kvöldstundar í Bæjarbíó í hjarta Hafnarfjarðar sem hugsuð er fyrir öll þau sem vilja fræðast um málefni barna og ungmenna. Fagleg fræðsla um jafnrétti og kynheilbrigði er öllum mikilvæg, ungum sem öldnum. Upplýst og opið samfélag ýtir undir markmið Hafnarfjarðarbæjar um að vera bær fjölmenningar og fjölbreytileika þar sem öll upplifa sig örugg, velkomin og fá tækifæri til að blómstra í sínu.

Free entry and all welcome!

Dagskrá kvöldstundar

• Hljómsveitin Bergmál treður upp með nokkrum skemmtilegum lögum
• Hvers vegna er mikilvægt að skólakerfið og foreldrar styðji hinsegin börn og ungmenni. Rósa Björg Ómarsdóttir (hún) teymisstjóri transteymis BUGL og hjúkrunarfræðingur
• Kynbundið ofbeldi: Mikilvægi kynjafræði og kynfræðslu í skólakerfinu. Eygló Árnadóttir (hún) sérfræðingur í ábyrgð skóla varðandi kynbundið ofbeldi
• HHH – Hinsegin hittingar í Hafnarfirði. Sigmar Ingi Sigurgeirsson (hann) og Dagný Kára Magnúsdóttir (hún) starfsfólk félagsmiðstöðvar HHH
• Reynslusaga. Guðbjörg Kolbeins segir reynslusögu sína sem hinsegin ungmenni
• Kynjafræði og kynfræðsla í grunnskólum Hafnarfjarðar.Kristín Blöndal Ragnarsdóttir (hún) kynjafræðingur, kennari og verkefnastýra innleiðingar kynfræðslu og kynjafræði í grunnskóla Hafnarfjarðar

Stýring kvöldstundar er í höndum Kristínar Blöndal Ragnarsdóttur kennara og kynjafræðings. Hafnarfjarðarbær hefur samið við Kristínu um að stýra innleiðingu á kynjafræði og kynfræðslu í alla grunnskóla bæjarins frá og með hausti 2023. Kristín hefur undanfarnar vikur og mánuði unnið að undirbúningi fræðslunnar í nánu samstarfi við starfsfólk og fulltrúa allra grunnskóla í Hafnarfirði.

Þessi hvetjandi kvöldstund og framtak Heilsubæjarins Hafnarfjarðar er liður í heilsueflingu Hafnfirðinga og vina Hafnarfjarðar og talar í takt við þá heilsustefnu sem sveitarfélagið mótaði 2016. Eitt af þremur yfirmarkmiðum heilsustefnu er að efla vellíðan íbúa.