Laugin og aðstaðan

Í Sundhöllinni er innilaug sem er 25 metrar að lengd, 8,7 metrar í breidd og í dýpri enda laugarinnar er hún 3,2 metra djúp. Tveir rúmgóðir heitir pottar eru í afgirtum garði við bygginguna með öflugum nuddtækjum sem njóta mikilla vinsælda. Sánaklefar eru í sérstökum karla- og kvennaklefum.

Laugin er mikið notuð af eldra fólki og íbúum í nágrenni laugarinnar. Sundfélag Hafnarfjarðar er með hluta af sínum æfingatímum í lauginni og nemendur í Víðistaðaskóla og Engidalsskóla sækja þangað í skólasund.

Elsta sundlaug Hafnarfjarðar

Sundhöll Hafnarfjarðar er elsta sundlaugin í Hafnarfirði. Í fyrstu var aðeins um útilaug að ræða við Krosseyrarmalir sem var tekin í notkun árið 1943. Það var síðan árið 1953 sem Sundhöll Hafnarfjarðar var tekin í notkun eftir að byggt hafði verið yfir útilaugina.