Swimming pools reopen

Breytingar á sóttvarnaráðstöfunum sem taka gildi á morgun fimmtudaginn 10. desember heimila opnun sundlauga og baðstaða fyrir allt að 50% af hámarksfjölda gesta samkvæmt starfsleyfi. Gildistími nýrrar ráðstöfunar er til og með 12. janúar 2021 nema annað sé auglýst. Börn fædd 2005 og síðar eru ekki talin með í gestafjölda. Sérstök athygli er vakin á því að hægt er að fá raunupplýsingar um fjölda sundlaugagesta á síðu hverrar laugar. 

Þetta þýðir að hámarksfjöldi í hverri laug er eftirfarandi:

• Ásvallalaug – 160 gestir
• Suðurbæjarlaug – 80 gestir
• Sundhöll Hafnarfjarðar – 32 gestir

Suðurbæjarlaug mun opna að nýju með inni- og útiklefum en rétt er að geta þess að eimbað og gufubaðsklefi kvenna í Suðurbæjarlaug verður áfram lokað. Jafnframt verða gufubaðsklefar karla í Sundhöll og Suðurbæjarlaug með mjög miklum takmörkunum á fjölda. Gestir eru hvattir til að gæta að 2 metra reglu í hvívetna og gæta fyllsta hreinlætis en samstarf í almannavörnum er forsenda þess að hægt er að hafa laugarnar opnar. Laugarnar verða opnar skv. venjubundnum opnunartíma þeirra.

Sjá opnunartíma sundlauga í Hafnarfirði

Hlökkum til að sjá ykkur í sundi!