Tökum hoppandi á móti páskunum!

….og hjálpumst að við að halda þeim heilum

Loft er komið í alla fjóra ærslabelgina sem settir hafa verið upp í Hafnarfirði. Vinna við gangsetningu eftir vetrardvöl hófst í gær og nú geta börn og ungmenni á öllum aldri tekið hoppandi á móti páskunum. Belgirnir eru yfirleitt opnir í takti við útivistartíma barna og ungmenna, til að byrja með frá kl. 9-18. 

Fjórir ærslabelgir í Hafnarfirði á tveimur árum

Allt frá því að ákvörðun bæjaryfirvalda í Hafnarfirði um kaup og uppsetningu á ærslabelgi var tekin vorið 2019 lá fyrir vilji fyrir því að setja upp belgi á fleiri stöðum í bænum og uppfylla vilja og óskir fjölmargra bæjarbúa. Ærslabelgur á Víðistaðatúni var opnaður sumarið 2019 og belgur á ÓlaRun túni ári seinna eða 17. júní 2020. Nýr ærslabelgur er í Stekkjarhrauni, skammt frá leikskólanum Hlíðarenda, var opnaður 16. júní 2021 og þá um haustið opnaði nýr belgur á lóð Hraunvallaskóla.

• Ærslabelgur á Víðistaðatúni
• Ærslabegur á ÓlaRun túni
• Ærslabelgur í Setbergi
• Ærslabelgur við Hraunvallaskóla

Á kortavef Hafnarfjarðarbæjar undir þjónusta og afþreying má sjá upplýsingar um nákvæma staðsetningu ærslabelganna í Hafnarfirði.

Hvað er ærslabelgur?

Ærslabelgur er niðurgrafin loftknúin hoppudýna sem er jafnhá landslaginu og hugsuð er fyrir fólk á öllum aldri til að njóta og leika sér við að hoppa og skoppa. Ærslabelgirnir eru tímastilltir og opnir frá kl. 9-22 alla daga vikunnar yfir sumartímann og frá kl. 9-18 vor og haust þar til frysta tekur og veturinn færist yfir. Ærslabelgirnir eru loftlausir yfir frostmánuðina. Allir „hopparar“ eru vinsamlegast beðnir um að skemmta sér kostulega en fara á sama tíma varlega og eftir þeim reglum sem gilda. Og munum að belgirnir eru sameign allra Hafnfirðinga og því allra hagur að umgengni sé góð. Það gerum við aðeins saman.