Allir unglingar fá spjaldtölvur

Á þessu skólaári fá allir nemendur í
8.-10. bekkjum grunnskólanna í Hafnarfirði iPad  til persónulegrar
notkunar í skólastarfinu og til notkunar heima fyrir. Spjöldin hafa verið að
fara í dreifingu til nemenda frá því fyrir jól og eru að komast til allra
nemenda þessa dagana. Enda um mikinn fjölda spjalda að ræða eða nálægt 1000
spjöld sem talsverður undirbúningur hefur farið í að gera spjöldin aðlöguð að
skipulagi og námskerfum skólanna. Með tilkomu spjaldanna gefast nemendum, og
kennurum sömuleiðis, ný tækifæri og möguleika að nýta sér betur tækninnar og
internetsins í námi og kennslu.

Kennarar á elsta stigi grunnskóla hafa
þegar fengið iPad spjöld og aðrir kennarar í grunnskólum bæjarins eiga von á
spjöldum núna á vorönn 2018.                                                                                                                                                                 

Frá hausti 2018 eru væntanleg spjöld
fyrir nemendur á miðstigi (5.-7. bekk) og verða þau spjöld afhent um leið og
uppsetningu þeirra lýkur á næsta skólaári.

Samhliða dreifingu spjaldanna til nemenda
og starfsfólks er farin í gang aukin fræðsla. Kennsluráðgjafar í
upplýsingatækni í grunnskólunum og kennslu­fulltrúi í upplýsingatækni á
skrifstofu fræðslu- og frístundaþjónustunnar skipuleggja og annast fræðsluna að
mestu auk þess sem aðrir eru kallaðir til eftir þörfum. Það er gert á þeirri
forsendu að með nýrri tækni er nauðsynlegt að læra vel á tæknina og uppgötva
nýja mögu­leika í því hvernig tæknin getur nýst til að breyta kennsluháttum og
stuðlað að námi. Það gerir enginn nema kennarinn sjálfur og nemendur hans. Með
spjöldunum er verið að færa nemendum ný verkfæri í námi og kennurum nýjustu
tækni sem möguleg er til að efla skóla­starfið. Tilkoma spjalda færir möguleika
á nýjum kennsluháttum sem nefndir hafa verið „1:1 kennslufræði“, þ.e. eitt tæki
og einn nemandi sem gefur aukna möguleika að persónulegri aðlögun í námi út frá
einstaklingum og námsefni.

Framundan er því margvísleg vinna sem
tengist  kennslu með nýrri tækni og notkun iPad. Það er m.a. fjölbreytt
fræðsla, frekari stefnumótunarvinna, þátttaka í ráðstefnum og ferðum og fleira
sem styður við innleiðingu stafrænnar tækni í skólastarfi grunnskóla í
Hafnarfirði á næstu árum.