Fleiri stjórnendur bæjarins setjast á skólabekk
Leiðtogaskólinn hefur nú verið settur í annað sinn. Stefnt er að því að allir stjórnendur Hafnarfjarðarbæjar sitji skólann og geri þannig Hafnarfjarðarbæ að enn eftirsóknarverðari vinnustað.
Hvattir áfram fyrir árangursmiðaða menningu
Hátt í þrjátíu stjórnendur Hafnarfjarðarbæjar settust á skólabekk í dag 3. febrúar og hófu nám í Leiðtogaskólanum. Þeir skipa annan hópinn sem sest á bekkinn en skólinn var í fyrsta sinn settur fyrir jól.
Markmið skólans eru skýr. Skapa á menningu árangursmiðaðar stjórnunar á vinnustaðnum í samræmi við einkunnarorð Hafnarfjarðarbæjar: hlýleg, áreiðanleg og snjöll þjónusta. Hópinn skipa sviðsstjórar, forstöðumenn, deildarstjórar, skóla- og leikstjórar og fleiri leiðtogar í starfi hjá bænum.
Styrktir til framþróunar
Tilgangurinn er að efla leiðtogahæfni stjórnenda hjá Hafnarfjarðarbæ og hvetja starfsmenn til frekari framþróunar. Auka vitund þeirra um eigin áhrif á þróun vinnustaðarmenningar og árangur sinnar skipulagsheildar.
Stjórnendurnir sitja átta ólíkar 3,5 klukkustunda langar vinnustofur. Stefnt er að því að sem allra flestir stjórnendur fari í gengum námið á næstu þremur árum.
Auka innsýn stjórnenda
Stjórnendurnir fá meðal annars innsýn í valdeflandi leiðtogaþjálfun, góða stjórnsýslu, hvernig leiðtoginn er hreyfiafl, fjármál, jafnræði og stjórnun.