5 hafnfirskir hestar til liðs við Póstinn

Hestar nýttir við afhendingu sendinga á ný

Pósturinn leitar sífellt leiða til að draga úr losun gróðurhúsalofttegunda og eitt af aðalmarkmiðum ársins 2023 er að fjölga grænum leiðum. Nú er því þarfasti þjónninn aftur genginn til liðs við Póstinn sem mun hafa mikið að segja í baráttunni gegn loftlagsvandanum. Hafið er tilraunaverkefni í samstarfi við Sörla í Hafnarfirði og Hafnarfjarðarbæ sem lofar góðu.

Svar við hækkandi olíuverði og auknum kröfum um umhverfisvernd

Vilborg Ásta Árnadóttir hjá Póstinum segir að það þurfi að bregðast við hækkandi olíuverði og auknum kröfum um umhverfisvernd. „Það er gaman að segja frá því að hugmyndin um að nýta aftur hesta til að flytja póst og pakka manna á milli kom frá starfsmanni Póstsins í hugmyndasamkeppni um hvernig mætti minnka kolefnispor fyrirtækisins. Fyrst hlógum við þegar þessi hugmynd kom upp en þegar farið var að kanna málið kom í ljós hún er ekki svo fráleit,“ segir hún.

„Við höfum bæði ráðfært okkur við sérfræðing í Bretlandi, Ellis Brigham, sem starfar í hestadeild lögreglunnar í Gloucestershire, og Atla Má Ingólfsson, formann Hestamannafélagsins Sörla. Þeir eru sammála um að íslenski hesturinn henti vel í þetta verkefni því hann er bæði sterkur og gáfaður og þægilegur í umgengni. Svo er skapgerð hestanna okkar víst mjög góð fyrir krefjandi verkefni eins og þetta,“ segir hún.

Tilraunaverkefni í Hafnarfirði í samstarfi við Sörla og Hafnarfjarðarbæ

Nú er hafið tilraunaverkefni í samstarfi við Sörla í Hafnarfirði og Hafnarfjarðarbæ sem snýst um að nýta hesta á ný til að dreifa pósti og pökkum í hverfum Hafnarfjarðar. „Það tekur tíma að þjálfa hestana en þau Gustur, Funi, Gerpla, Tígull og Ósk lofa góðu og hafa þegar farið í fyrstu ferðirnar með pinkla og bréf í úthverfum Hafnarfjarðar,“ segir Atli sem er spenntur fyrir tilraunaverkefninu. „Það er gaman að finna íslenska hestinum nýjan tilgang í breyttum heimi,“ bætir hann við.

Mikilvægt afturhvarf til fortíðar

Vilborg segir að það krefjist nokkurs undirbúnings að koma verkefninu á koppinn. „Við höfum auglýst eftir knöpum innanhúss til að sinna þessu verkefni. Viðkomandi þurfa að vera alvanir hestamennsku og hafa mikinn áhuga á að taka þátt í tilrauninni með okkur. Þó að Pósturinn sigli á hraðbyri inn í stafræna framtíð er þetta afturhvarf til fortíðar nauðsynlegt til að sporna gegn losun gróðurhúsalofttegunda. Við bindum miklar vonir við verkefnið. Ég held að fólki muni þykja gaman að sjá þarfasta þjóninn á götum bæjarins á ný,“ segir Vilborg að lokum og strýkur yfir snoppuna á Ósk.

Undir þetta tekur bæjarstjóri Hafnarfjarðar, Rósa Guðbjartsdóttir: „Lágmörkun losunar gróðurhúsalofttegunda, virkt hringrásarhagkerfi og vistvænar samgöngur eru okkur mikið hjartans mál. Það er því ekki annað hægt en að fagna framtaki Póstsins og hoppa á hestvagninn. Á sama tíma leggjum við mikla rækt við bæjarbraginn, sögulega arfleifð, hlýleika og upplifun í einstöku umhverfi. Mig grunar að íbúar muni taka vel í þessa „nýjung“ hér heima í Hafnarfirði.“