Félagsleg úrræði

Allir íbúar Hafnarfjarðar eiga að geta búið við fjárhagslegt og félagslegt öryggi.

Ráðgjöf

Sækja um ráðgjöf

Flest þurfum við stuðning á einhverjum tímapunkti í lífinu. Félagsráðgjafar bæjarins aðstoða íbúa við að takast á við ýmis konar áskoranir.

Hvað er félagsleg ráðgjöf?

Félagsráðgjafar aðstoða fólk við persónuleg og félagsleg vandamál. Meðal annars aðstoða ráðgjafar fólk við að leita sér félagslegra úrræða.

Dæmi um ráðgjöf og aðstoð:

  • Fjárhagsaðstoð
  • Að finna húsnæði
  • Að greiða húsnæði
  • Uppeldi
  • Skilnaður
  • Forsjá og umgengni

Að sækja um ráðgjöf

Allir íbúar Hafnarfjarðar eldri en 18 ára geta sótt um félagslega ráðgjöf gegnum Mínar síður. Það er hægt að fá túlk ef þörf er á.

Símatími ráðgjafa

Þau sem eru komin með ráðgjafa geta hringt í sinn ráðgjafa gegnum Þjónustuver í síma 585 5500 alla virka daga nema þriðjudaga kl. 8:30–9:00.

Einnig er hægt að hringja í Þjónustuver mánudaga–fimmtudaga kl. 8–16 og föstudaga kl. 8–14. Þar er hægt að fá ýmsar upplýsingar og hægt að fá samband við almennan ráðgjafa sem er laus.

Samvinna eftir skilnað

Foreldrar geta fengið sérhæfða skilnaðarráðgjöf í Hafnarfirði til að stuðla að betri foreldrasamvinnu. Ráðgjöfin er með hagsmuni barnsins að leiðarljós og er veitt til að koma í veg fyrir eða draga úr ágreiningi foreldra sem standa í skilnaði eða hafa gengið í gegnum skilnað. Það er ekki skilnaðurinn sjálfur sem veldur mestum skaða, heldur það hvernig staðið er að honum gagnvart börnunum.

Samvinna eftir skilnað (Samarbejde efter skilsmisse (SES)) var upphaflega þróað í Danmörku. Rannsóknir sýnt mun á líðan þeirra sem taka þátt í verkefninu og þeirra sem ekki gera það. Námsefninu er ætlað að hjálpa foreldrum við að takast á við breytingar og áskoranir sem algengar eru í kjölfar skilnaðar eða sambúðarslita.

Foreldrum stendur til boða:

  • Rafrænt námskeið. Þar er farið í áhrif skilnaðar á foreldra, viðbrögð barna og samvinna foreldra.

Sérhæfð ráðgjöf hjá SES ráðgjöfum Hafnarfjarðarbæjar. Sótt er um ráðgjöfina á Mínum síðum.

Ofbeldi er aldrei í lagi

Sérstakt teymi starfar hjá bænum sem veitir hjálp gegn heimilisofbeldi. Hægt er að fá samband við sérfræðing í teyminu gegnum Þjónustuver á skrifstotutíma í síma 585 5500.

Ef þú ert í ofbeldissambandi eða grunar að verið sé að beita einhvern ofbeldi er best að hafa samband við 112 í síma eða gegnum netspjall. Á 112.is má finna fræðslu um ofbeldi og hvaða úrræði eru í boði.