Að þakka og njóta skilar árangri

Anton Sveinn McKee úr SH var kjörinn Íþróttakarl Hafnarfjarðar 2019 og einnig 4. besti á landsvísu. Bæjarblaðið Hafnfirðingur ræddi við Anton sem er gríðarlega þakklátur og hefur sett sér mikilvæg markmið.

„Þetta er fyrst og fremst gífurlegur heiður. Eftir að hafa fórnað mörgu til að komast á þann stað sem ég er á í dag í sundinu, þá horfi ég á þessa viðurkenningu sem staðfestingu á því að ég sé á réttri braut í lífinu. Mér hefði ekki dottið í hug að ég ætti séns að ná þessum viðurkenningum í byrjun ársins 2019, þannig að komast svona langt á einu ári er mikil hvatning fyrir Ólympíuárið 2020,“ segir Anton og bætir við að markmið hans fyrir árið í ár sé að vera besta útgáfan af sjálfum sér, reyna að bæta sig á hverjum degi og njóta þess að fá að synda.

„Eftir að ég byrjaði aftur að synda eftir pásu árið 2017 þá hef ég horft á sundið sem forréttindi og ég er gífurlega þakklátur fyrir að geta stungið mér til sunds fyrir Íslands hönd á stærstu mótum í heimi. Með því að einblína á þessi markmið þá mun árangurinn í sundinu koma sjálfkrafa.“

^{Anton ásamt íþróttakonu Hafnarfjarðar 2019, Þórdísi Evu Steinsdóttur frjálsíþróttakonu úr FH, og Rósu Guðbjartsdóttur bæjarstjóra Hafnarfjarðar. Mynd: Olga Björt Þórðardóttir}

Hætti 2017 en Ólympíuleikarnir framundan

Anton flutti frá Boston í USA til háskólabæjar í Virginíu til að einbeita sér að sundinu. „Hér hef ég frábæran þjálfara, Sergio Lopez, sem ég treysti vel til að taka mig alla leið á Ólympíuleikunum. Einnig er ég í styrktarþjálfun hjá Davíð Jónatanssyni, en hann sér um þrekið fyrir SH-inga.“ Spurður um stöðu afreksfólks í sundi og hugarfarið sem þarf til segir Anton að því miður sé erfitt að vera afreksmaður í sundi og líka öðrum Ólympíuíþróttum á Íslandi. „Ég hætti að synda árið 2017 og var með engar áætlanir um að koma aftur. Ég sá ekki fram á að geta bara æft sundið og fór því að vinna í Bandaríkjunum. Eftir að hafa ekki snert sundlaug í rúma 6 mánuði fór mig að kitla aðeins í að byrja æfa aftur. Eftir þetta hef ég einblínt á að njóta þess að synda og hefur það skilar sér. Það sem hefur haldið mér gangandi og er jafnframt eiginleikinn sem þarf í þetta er viljinn til að sjá hvað í sér býr. Ég veit ég á mun meira inni og þess vegna langar mér að halda áfram að æfa. Ólympíuleikarnir eru stærsta íþróttahátíð í heimi og enginn stærri heiður til en að fá að keppa þar fyrir hönd Íslands.“

Félag Antons, Sundfélag Hafnarfjarðar, var valið lið ársins 2019 á Íþróttahátíð Hafnarfjarðar. Mynd: Olga Björt Þórðardóttir

„Aldrei hætta að læra“

Anton segir að frábærir og vel menntaðir þjálfarar þjálfarar og aðstaða gerir Íslendingum kleift að ala upp heimsklassa sundfólk. „Ásvallalaugin hefur án efa hjálpað SH að verða sterkasta félagið á Íslandi. Að hafa svona góða aðstöðu gerir okkur kleift að einbeita okkur að því að verða betri, í staðinn fyrir að berjast við íslenska veðráttu í Suðurbæjarlauginni.“ Að lokum er Anton með skilaboð til þeirra sem vilja ná langt: „Aldrei hætta að læra og góðir hlutir gerast hægt. Ég er ennþá að læra að verða betri sundmaður í dag, þrátt fyrir að hafa æft sund í yfir 20 ár. Það er ekki hægt að ætlast til að verða góður á skömmum tíma. Frekar á maður að setja sér krefjandi en viðráðanleg markmið og nota sjálfan sig sem mælistiku í staðinn fyrir að eyða orku í að fylgjast með því hvað aðrir eru að gera. Mikilvægasta spurningin sem ég spyr mig daglega er: „Gerði ég allt til þess að verða betri í dag en ég var í gær?“

Viðtal við íþróttakarl Hafnarfjarðar 2019 birtist í Hafnfirðingi 8. janúar