Aðgerðir Hafnarfjarðarbæjar vegna Covid19 samþykktar

Bæjarstjórn Hafnarfjarðar samþykkti einróma í dag
aðgerðaáætlun til þess að bregðast við afleiðingum COVID-19 faraldursins.
Áætlunin er í 11 liðum þar sem heilsa og velferð íbúa og starfsfólks Hafnarfjarðarbæjar
er sett í forgang, samhliða því sem brugðist er við efnahagslegum áhrifum
faraldursins á íbúa, félög og fyrirtæki, auk sveitarfélagsins sjálfs.

Sjá aðgerðaáætlun bæjarstjórnar Hafnarfjarðarbæjar vegna Covid19

Samkvæmt áætluninni verður létt á mánaðarlegri greiðslubyrði
íbúa og fyrirtækja með fjölgun gjalddaga fasteignaskatta og -gjalda, þ.m.t. lóðarleigu,
holræsagjalds og vatnsgjalds. Þá geta fyrirtæki sem orðið hafa fyrir meira en 25%
tekjutapi vegna faraldursins sótt um frestun allt að þriggja gjalddaga
fasteignaskatta og -gjalda fram á næsta ár.

Gjöld leikskóla, grunnskóla og frístundaheimila verða
leiðrétt í hlutfalli við þá skerðingu á þjónustu sem rekja má til faraldursins.
Sama á við um árskort á sundstaði og í bókasafn Hafnarfjarðar sem framlengd
verða sem nemur skertum afgreiðslutímum.

Áhersla verður lögð á að hraða skipulagsvinnu á
uppbyggingarsvæðum og að auka viðhaldsframkvæmdir og uppbyggingu innviða. Reynt
verður að finna leiðir til þess að hagræða enn frekar í rekstri bæjarins,
kannaðir verði möguleikar á sölu eigna og gætt að lausafjárstöðu bæjarfélagsins
með nýrri fjármögnun.

Komið verður til móts við íþrótta- og tómstundafélög í bænum
með það að markmiði að verja rekstur þeirra og starfsemi. Leitað verður leiða
til þess að standa vörð um menningar- og listalíf bæjarins og að efla skapandi
greinar. Þá verður leitað verkefna sem hentað gætu hafnfirsku námsfólki og
frumkvöðlum til vinnslu í tímabundnum störfum eða verktöku.

„Mikill einhugur er í bæjarstjórn um að bregðast við
afleiðingum faraldursins með skjótum og markvissum aðgerðum. Á tímum sem þessum
ríður á að standa saman og bæjarfulltrúar Hafnarfjarðar hafa ekki vikið sér frá
þeirri ábyrgð,“ segir Rósa
Guðbjartsdóttir bæjarstjóri. „Aðgerðirnar miða að því að lágmarka áhrif
þeirrar niðursveiflu sem óhjákvæmileg er og standa um leið vörð um þjónustu
bæjarfélagsins. Við leggjum áherslu á að hér er um fyrstu aðgerðir
Hafnarfjarðarbæjar að ræða og munum við grípa til frekari aðgerða eftir þörfum.“

Sjá aðgerðaáætlun bæjarstjórnar Hafnarfjarðarbæjar vegna Covid19