Alþjóðadagur kennara

Alþjóðadagur kennara er haldinn hátíðlegur um heim allan 5. október og hefur svo verið gert síðan 1996. Markmið alþjóðadagsins er að vekja athygli á því mikilvæga starfi sem kennarar inna af hendi á degi hverjum. Til hamingju með daginn kæru kennarar!

Metum kennara að verðleikum – styrkjum stöðu þeirra

Stofnað var til Alþjóðadags kennara að frumkvæði UNESCO og Alþjóðasamtaka kennara (Education International) árið 1994. Markmið með deginum hefur ávallt verið að vekja athygli á því mikilvæga starfi sem kennarar gegna í heiminum – en líka að efla samtakamátt kennara og huga að hvernig menntun barna verður best háttað í framtíðinni. Alþjóðasamtökin velja baráttumál hvers árs og að þessu sinni er yfirskriftin Metum kennara að verðleikum – styrkjum stöðu þeirra.  Innan vébanda Alþjóðasamtaka kennara er um 30 milljón kennarar sem tilheyra rúmlega 400 kennarasamtökum í 171 landi. Íslenskir kennarar eru í þessum hópi enda KÍ aðili að Alþjóðasamtökum kennara. 

Kennarasamband Íslands mun sem fyrr fagna Alþjóðadegi kennara. Efnt er til smásagnasamkeppni í leik-, grunn- og framhaldsskólum um land allt þar sem þemað er „kennarinn minn“. Samkeppni af þessu tagi fór fram í fyrsta skipti í fyrra og þótti takast afar vel. Þá verður Skólamálaþing KÍ haldið í dag.  Á þinginu verður fjallað um faglega forystu kennara og verður aðalfyrirlesari dr. David Frost, prófessor og fræðimaður við Cambridge-háskóla. Kveikja Skólamálaþingsins er starf hjá KÍ sem miðar að því að auka jákvæða umræðu um kennarastarfið og skóla- og menntamál sem og bókin Flip the System. Changing Education from the Ground Up sem kom út í tengslum við heimsþing Alþjóðasamtaka kennara (EI) á síðasta ári. Tilgangur hennar er að styðja við kennara og samtök þeirra í því að efla kennarastéttina sem forystuafl í skóla- og menntamálum og menntun sem leiðarljós jafnræðis og lýðræðis í samfélaginu. Dr. David Frost er meðal höfunda greina í bókinni um faglega forystu kennara.

 Myllumerki dagsins er #kennaradagurinn hér á landi en þeir sem vilja blanda sér í alþjóðlega umræðu dagsins geta notað #worldteacherday. 

Við óskum öllum kennurum landsins til hamingju með daginn!