Arngunnur Ýr er bæjarlistarmaður Hafnarfjarðar 2025

Bæjarlistarmaðurinn 2025

Arngunnur Ýr Gylfadóttir myndlistarkona er bæjarlistamaður Hafnarfjarðar árið 2025. Arngunnur Ýr hefur skapað sér gæfuríkan feril til áratuga. Verk hennar hafa vakið athygli og hún haldið einka- og samsýningar hér heima, í Bandaríkjunum og meginlandi Evrópu. Hefð hefur skapast fyrir því að halda síðasta vetrardag hátíðlegan í Hafnarfirði með vali á bæjarlistamanni ársins.

„Ég er svo sannarlega stolt. Virkilega heiðruð, glöð og þakklát. Ég vil gefa af mér og finnst frábært að fá til baka,“ segir Arngunnur Ýr um nafnbótina.

„Ég hef þurft á myndlist að halda alveg síðan ég var eins árs segja foreldrar mínir. Það er satt. Ég var alltaf að teikna. Sterkasti krafturinn í mér er þessi þörf fyrir að tjá það sem ég upplifi. Þá er það yfirleitt á blaði, striga eða viðarplötu. Þannig hefur það verið alla mína tíð,“ segir hún.

Takk fyrir hönd Hafnfirðinga

Valdimar Víðisson, bæjarstjóri Hafnarfjarðar, óskar Arngunni Ýr til hamingju. Hafnfirðingar séu stoltir af árangri hennar en myndlistarkonan hefur valið sér samastað í Hafnarfirði í nærri aldarfjórðung á milli þess sem hún ferðast á milli heimila sinna hér og í Kaliforníu. Hún byggir einnig hús á Havaí. Einmitt það landnám fjölskyldunnar var efniviðurinn í einkasýningu hennar í Hafnarborg nú í vetur.

„Ég þakka Arngunni Ýr fyrir framlag hennar til menningarlífsins í Hafnarfirði fyrir hönd Hafnfirðinga. Við vonum öll að nafnbótin bæjarlistamaður Hafnarfjarðar 2025 verði henni hvatning til áframhaldandi árangurs við listsköpun sína,“ segir Valdimar.

Valdimar Víðisson bæjarstjóri og Arngunnur Ýr við athöfnina í Hafnarborg í dag.

Ísland togar hana alltaf heim

Arngunnur Ýr segir að Ísland hafi togað í hana alla tíð, þótt hún hafi búið víða. Meðal annars í Nova Scotia sem unglingur en kom ein heim með skipinu Goðafossi þegar fjölskyldan varð eftir ytra. „Aðdráttaraflið hefur togað mig út í heim en ég alltaf leitað heim,“ segir hún. Hún hafi fundið sér samastað í Sléttuhlíð í Hafnarfirði. Þar er hún einnig með vinnustofu.

„Ég elska svæðið og stemninguna í Hafnfirðinum,“ segir hún. „Við maðurinn minn búum hér og ég nýt þess að ganga þær mörgu dásamlegu gönguleiðir í nágrenninu. Hann fer í Suðurbæjarlaug og spjallar þar við fólkið. Ég er ekkert að fara og mun aldrei selja húsið mitt hér enda kann ég svo vel við bæjarbraginn,“ segir hún og brosir.

Hlotið ýmsar viðurkenningar

Arngunnur Ýr hefur hlotið ýmis verðlaun og viðurkenningar fyrir verk sín. Hún útskrifaðist með BFA-gráðu í málaralist frá San Francisco Art Institute árið 1986. Hún var síðar gestanemi við Gerrit Rietveld-akademíuna í Amsterdam, Hollandi, 1989 til 1990 en sneri aftur til Kaliforníu og lauk meistaragráðu í málaralist frá Mills-háskólanum í Oakland árið 1992. Allt frá 10. áratugnum hefur landslag átt hug hennar.

„Ég er alltaf að nota náttúruna á einhvern hátt. Ekki bara til að mála einhverja fallega mynd heldur býr alltaf eitthvað meira og dýpra að baki. Þetta snýst um að það er undirliggjandi saga og það þarf að grafa dýpra og skoða verkin,“ lýsir hún rétt eins og sást í sýningu hennar Kahalii.

Við óskum Arngunni Ýri innilega til hamingju með titilinn með hjartans þökkum fyrir eftirtektarvert framlag í þágu menningarlífsins í Hafnarfirði!

Þau sem hlotið hafa nafnbótina bæjarlistamaður Hafnarfjarðar eru:

2024 – Ebba Katrín Finnsdóttir, leikkona

2023 – Pétur Gautur, myndlistamaður

2022 – Björn Thoroddsen, gítarleikari

2021 – Friðrik Dór Jónsson, tónlistarmaður

2020 – Bergrún Íris Sævarsdóttir, barnabókahöfundur og teiknari

2019 – Björk Jakobsdóttir, leikkona og leikstjóri

2018 – Björgvin Halldórsson, tónlistarmaður

2017 – Steingrímur Eyfjörð, myndlistarmaður

Ekki voru útnefndir bæjarlistamenn á árunum 2015 til 2016

2014 – Andrés Þór Gunnlaugsson, tónlistarmaður

Ekki voru útnefndir bæjarlistamenn á árunum 2010 til 2013

2009 – Jóhanna Guðrún Jónsdóttir, söngkona

2008 – Sigurður Sigurjónsson, leikari

2007 – Jónína Guðnadóttir, myndlistarmaður

2006 – Elín Ósk Óskarsdóttir, söngkona

2005 – Sigrún Guðjónsdóttir (Rúna), myndlistarmaður

Við val á bæjarlistamanni Hafnarfjarðar kallar menningar- og ferðamálanefnd eftir tilnefningum bæjarbúa. Árlega berst mikill fjöldi þeirra enda hefur Hafnarförður stimplað sig inn sem vagga menningar og lista.

Hafnarfjarðarbær er þekktur fyrir iðandi menningarlíf sem er drifið áfram af kraftmiklu listafólki þar sem einstaklingurinn sjálfur, framlag hans, sköpun og þátttaka spilar stærsta hlutverkið. Bæjarlistamaður fær 1,5 milljónir í viðurkenningarskyni til að vinna áfram að list sinni.

MYNDATEXTI: Myndir hér fyrir neðan af vinnustofu Arngunnar degi fyrir afhendinguna.