Ásvallabraut opnar fyrir umferð

Ný Ásvallabraut í Hafnarfirði opnaði fyrir umferð í dag en
framkvæmdir við brautina hófust vorið 2020. Með opnun Ásvallabrautar frá
Skarðshlíð að Áslandi 3 eru tengd saman byggðasvæði sitt hvoru megin Ásfjalls
og þar með verða Skarðshlíð og hverfin ofarlega á Völlum betur tengd
Kaldárselsvegi og Reykjanesbraut. Einnig mun Ásvallabraut þjóna Hamranesi, nýju
hverfi gegnt Skarðshlíð sem er í hraðri uppbyggingu og þeim hverfum sem
fyrirhuguð eru í Áslandinu í náinni framtíð.

^{Rósa Guðbjartsdóttir bæjarstjóri Hafnarfjarðar og
Kristmundur Einarsson framkvæmdastjóri Snóks hf. klipptu
á borða og opnuðu Ásvallabrautina formlega.}    

Mikilvæg framkvæmd fyrir íbúa í Hafnarfirði

Opnun Ásvallabrautar er stór og þýðingarmikil framkvæmd í
sögulegu samhengi og í þeirri uppbyggingu sem er að eiga sér stað á vinsælu
uppbyggingarsvæði sem hefur uppland Hafnarfjarðar í bakgarðinum. Brautin hefur
verið á skipulagi frá 1980 og átti að liggja nær byggð í Áslandi 3 en hagræn
greining sem unnin var á árinu 2017 markaði endanlega legu brautarinnar sem í
dag er ein akrein í hvora átt með möguleika á breikkun í tvær akreinar í hvora
átt. Með tilkomu Ásvallabrautar verða tvær leiðir úr og í Vallahverfi og stækkandi
hverfi Skarðshlíðar og Hamraness. Gönguleiðir liggja norðan við Ásvallabraut og
tengjast íbúðahverfi við Brekkuás. Þá liggur göngustígur samhliða brautinni.

^{Hér má sjá hópinn sem mætti til opnunar og tók þátt í
samakstri á nýrri leið á milli byggðasvæða í Hafnarfirði.}  

„Ásvallabrautin er afar mikilvægur þáttur í uppbyggingu
og eflingu byggðar í Hafnarfirði og mun gjörbreyta samgöngum og aðgengi inn á
nýjustu íbúða- og atvinnusvæði bæjarins. Ný mislæg gatnamót við Krýsuvíkurveg voru tekin
í notkun í árslok 2017 og fyrir ári var opnað fyrir umferð á tvöfaldri
Reykjanesbraut í gegnum Hafnarfjörð. Opnun Ásvallabrautar er enn einn liður í
því að greiða samgöngur innan bæjarins og milli hverfa“ segir Rósa
Guðbjartsdóttir bæjarstjóri Hafnarfjarðar. „Ég óska íbúum Hafnarfjarðar og
starfsfólki fyrirtækja á svæðinu til hamingju með nýju brautina og veit að hún
mun nýtast vel“

Hátt í 3000 íbúðir munu rísa á svæðinu

Öllum lóðum í Skarðshlíð og Hamranesi hefur verið úthlutað
eða í heild lóðum fyrir um 2300 íbúðir, þar af rúmlega 1.700 í Hamranesi sem
ekki eru enn komnar í sölu. Uppbygging í Skarðshlíð er langt komin og fluttu fyrstu
íbúarnir í sín hús sumarið 2019. Í Hamranesi eru framkvæmdir hafnar á
verktakalóðum fyrir 148 íbúðir í fjölbýli auk þess sem Bjarg íbúðafélag hyggst
byggja 148 íbúðir í hverfinu. Um mitt ár 2021 var þróunarreitum í Hamranesi
úthlutað til átján aðila sem eru að vinna deiliskipulag á sínum reitum fyrir
alls rúmlega 1400 íbúðir. Á nokkrum þessara reita eru framkvæmdir við það að hefjast.
Áframhaldandi uppbygging í Áslandi er í undirbúningi og er gert ráð fyrir að
úthlutun á lóðum í Áslandi 4 fyrir hátt í 500 íbúðir hefjist á vormánuðum
2022. „Það er mikil eftirspurn eftir lóðum og íbúðum í Hafnarfirði og því
hefur allt kapp verið lagt á að hraða skipulagningu og greiða fyrir uppbyggingu
bæði á nýjum svæðum og með þéttingu byggðar. Hafnarfjörður er einstakur og
hlýlegur bær sem hefur allt til alls. Það er í forgrunni hjá okkur að sinna núverandi íbúum vel en við munum
sannarlega taka fagnandi á móti nýjum Hafnfirðingum“ segir Rósa að lokum.