Bjartir dagar – þín þátttaka?

Menningarhátíðin Bjartir dagar verður haldin dagana 19.-23. apríl í tengslum við Sumardaginn fyrsta eins og undanfarin ár. Bjartir dagar er þátttökuhátíð og byggir á því að stofnanir, félagasamtök, fyrirtæki og einstaklingar taki þátt í að skapa viðburði sem tengjast hátíðinni eða taki þátt í þeim dagskrárliðum sem aðrir skipuleggja.

Ertu með hugmynd að dagskráratriði?

Óskað er eftir hugmyndum að dagskrá Bjartra daga 2017. Það getur verið eitthvað sem hefð er fyrir og er nú þegar á dagskrá eða eitthvað alveg nýtt, eitthvað risastórt eða minna í sniðum, eitthvað fyrir börn eða eitthvað fyrir fullorðna en allavega eitthvað sem hvetur bæjarbúa til virkrar þátttöku.

Beiðni um fjárframlag til verkefna

Til þess að styðja við frumkvæðisverkefni verður hluta af fjármagni Bjartra daga, allt að einni milljón, úthlutað til ýmissa smærri verkefna sem fara fram á Björtum dögum. Stofnanir, félagasamtök, fyrirtæki og einstaklingar geta sótt um um fjármagn til verkefna sem fara fram dagana 19.-23. apríl að hámarki 100.000.- kr. Beiðni um fjárframlag skal senda verkefnastjóra Bjartra daga á: andriom@hafnarfjordur.is fyrir 8. mars og úthlutun verði lokið 15. mars. Við úthlutun verður tekið mið af reglum menningar- og ferðamálanefndar Hafnarfjarðar um styrki til menningarstarfsemi. Vakin er athygli á að menningar- og ferðamálanefnd hefur auglýst eftir umsóknum um styrki til verkefna og viðburða til eflingar á hafnfirsku listalífi árið um kring sem skipuleggjendum viðameiri verkefna er vinsamlega bent á.

Nú er um að gera að leggja höfuðið í bleyti og koma með hugmyndir að dagskrá og senda undirrituðum upplýsingar. 

Lokafrestur til að senda inn dagskráratriði er 5. apríl.