Blásarafornám í stað blokkflautukennslu

Yngri lúðrasveitin orðin 35 barna sveit

Breytingar sem gerðar voru á seinna ári forskólans í Tónlistarskóla Hafnarfjarðar haustið 2019 hafa orðið til þess að aðsókn í blásaradeild skólans að forskólanámi loknu hefur aukist til muna. Forskólinn breyttist í blásarafornám þar sem nemendur læra á blásturshljóðfæri í litlum hópum í stað hefðbundinnar blokkflautukennslu bæði í húsnæði skóla og í auknu mæli í grunnskólum bæjarins. Yngri lúðrasveitin, sem var 16 barna sveit, er nú orðin 35 barna sveit. Tónlistarskóli Hafnarfjarðar fagnaði 70 ára stofnafmæli í september 2020 og verður afmæli fagnað með fjölbreyttum hætti um leið og umhverfi og aðstæður leyfa.

^{Mun fleiri nemendur í Tónlistarskóla Hafnarfjarðar velja sér ólík blásturshljóðfæri sem sitt hljóðfæri fyrir áframhaldandi nám eftir breytingu á forskólanámi skólans.}  

Vinsældir tréblásturs- og málmblásturshljóðfæra aukast

Nemendur hefja forskólanámið við 6 -7 ára aldur. Forskólinn
hefur þann tilgang að búa börnin undir hljóðfæranám og er áhersla í upphafi
lögð á söng, hreyfingu og hlustun auk þess sem þætti sköpunar er sinnt með
allskonar verkefnum þar sem nemendur búa sjálfir til tónlist. Á fyrra árinu er
m.a. lögð áhersla kennslu á blokkflautu en sú breyting var gerð haustið 2019 að
breyta seinna árinu í blásarafornám. Þessi breyting hefur orðið til þess að mun
fleiri nemendur velja sér ólík blásturshljóðfæri sem sitt hljóðfæri að loknu
námi í forskólanum. Gítar, píanó og trommur halda áfram að tróna á toppnum sem
fyrsta val en nú eru tréblásturshljóðfæri eins og þverflauta, klarinett,
saxófónn og óbó og málmblásturshljóðfæri eins og kornett, trompet, horn,
baritónhorn, básúna og túba farin að sækja í sig veðrið. Hægt að hefja nám á
öll þessi hljóðfæri strax eftir nám í forskóla og frá upphafi náms og um leið
og ákveðinni grunnfærni hefur verið náð á sér stað samspil í lúðrasveitum og
öðrum samleikshópum.

Mjög öflugt tónlistarnám og tónleikahald fer fram í Tónlistarskóla Hafnarfjarðar