Bókaviti settur upp í Hellisgerði

Skiptibókamarkaður sem er opinn allan sólarhringinn.
Gríptu bók og gefðu aðra í staðinn

Í upphafi sumars viðraði Heilsubærinn Hafnarfjörður þá
hugmynd við samtökin á bak við Karlar í skúrum að sjá um smíði á bókavita sem
nýtast myndi sem skiptibókamarkaður allt árið um kring. Karlarnir í skúrnum
notuðu sumarið 2021 til að hanna, smíða og mála vitann með aðkomu margra aðila.
Bókavitinn var opnaður formlega í dag á upphafsdegi Bóka- og bíóhátíðar
barnanna 2021 í Hafnarfirði og er hann öllum opinn.

^{Leikskólabörn frá Víðivöllum og Álfabergi fylltu nýjan bókavita af bókum}  

Bókavitinn þegar fullur af bókum

Bókavitinn hefur verið settur upp á horni Hellisgötu og
Reykjavíkurvegar, við einn af nokkrum inngöngum í Hellisgerði, skrúðgarð
Hafnfirðinga. Það þótti viðeigandi á upphafsdegi Bóka- og bíóhátíðar barnanna
að fá hóp leikskólabarna til að taka
þátt í formlegri opnun á vitanum með því að fylla hann af bókum að heiman.
Hvert barn lét sína bók í vitann og nú er hann uppfullur af ævintýrum og
áhugaverðum bókum. Lestur og lesskilningur er Hafnfirðingum hugleikinn og er
verkefnið liður í því að ýta enn frekar undir aðgengi að bókum. Hafnfirðingar
og vinir Hafnarfjarðar eru hvattir til að nýta sér bókavitann í leit sinni að ævintýrum og nýrri þekkingu,
til að grípa sér bók og gefa aðra í
staðinn.

Samfélagslegt verkefni sem ýtir undir samveru og
félagsleg tengsl

Karlar í skúrum er samfélagslegt verkefni sem Rauði krossinn
hrinti af stað í upphafi árs 2018 og er nú m.a. til húsa að Helluhrauni 8 í
Hafnarfirði. Verkefnið, sem er að ástralskri fyrirmynd, er vel þekkt víða um
Evrópu og byggir á þeirri hugmyndafræði að karlmenn tali best saman þegar þeir
eru að vinna öxl í öxl með eitthvað í höndunum. Skúrinn sjálfur er hugsaður sem
öruggur og vinalegur vettvangur fyrir karlmenn frá 18 ára aldri til að hittast
og vinna að skapandi og skemmtilegum verkefnum, saman eða með sjálfum sér á
sínum eigin hraða og forsendum. Skúrinn að Helluhrauni er opinn alla virka daga
frá kl. 10-12 auk þess sem allir virkir meðlimir í verkefninu hafa lykil og
geta nýtta aðstöðuna þegar þeim hentar.

^{Kynslóðirnar mættust í Hellisgerði í dag í nafni læsis og bóka. Lestur er sannarlega lífsins leikur.} 

Bóka- og bíóhátíð barnanna 2021

Bóka- og bíóhátíð barnanna, menningarhátíð fyrir börn í
Hafnarfirði, er haldin vikuna 6. – 13. október. Þessa vikuna verður sérstök
áhersla lögð á bækur og kvikmyndir innan leik- og grunnskóla Hafnarfjarðar og
skapandi og skemmtileg verkefni sem tengjast hvoru tveggja. Tilgangur
hátíðarinnar er að efla áhuga barna á lestri og læsi í víðum skilningi og
styður hátíðin við læsisverkefni leik- og grunnskóla bæjarins sem í gangi hefur
verið síðustu misseri. Skólar og söfn bæjarins taka virkan þátt í hátíðinni með
uppbroti á skólastarfi, viðburðum og smiðjum.   

Dagskrá Bóka- og bíóhátíðar barnanna 2021