Börn af erlendum uppruna og íþróttir – vertu með!

Íþrótta- og Ólympíusambandi Íslands (ÍSÍ) og Ungmennafélagi Íslands (UMFÍ) vilja vekja athygli á bæklingi sem gefinn var út árið 2019 og endurútgefinn 2021 um ávinning þess að stunda íþróttir með íþróttafélagi. Markmið bæklingsins er að ná betur til foreldra barna og ungmenna af erlendum uppruna og fræða þau um kosti þess að börn og ungmenni séu þátttakendur í skipulögðu íþróttastarfi á Íslandi. Rannsóknir hafa sýnt að þátttaka þessara barna er um helmingi minni en barna af heimilum þar sem töluð er íslenska.

Allt efnið er aðgengilegt á rafrænu formi – á íslensku, ensku, pólsku, tælensku, litháísku, filippseysku, arabísku og víetnömsku.

Í bæklingnum eru hagnýtar upplýsingar um starfsemi íþrótta- og ungmennafélaga landsins. M.a. eru þar upplýsingar um æfingagjöld íþróttafélaga, frístundastyrki sveitarfélaga, kosti þess að stunda reglubundna hreyfingu í skipulögðu starfi og lögð er áhersla á mikilvægi þess að foreldrar taki þátt í íþróttaiðkun og starfi barnanna. 

Niðurstöður rannsókna sýna að þátttaka í skipulögðu íþrótta- og æskulýðsstarfi hefur ýmis jákvæð áhrif á líðan og hegðun ungmenna, í því sambandi má nefna:

• Þau eru líklegri til að vera heilsuhraustari og líða betur andlega, líkamlega og félagslega heldur en þau börn sem taka ekki þátt í starfinu.
• Þau fá útrás fyrir hreyfiþörf sína og nota síður tóbak, áfengi eða önnur vímuefni.
• Þau læra að takast á við sigra og töp, setja sér markmið, sýna vinnusemi og tillitsemi, vinna í hóp, virða skoðanir annarra og fara eftir reglum.
• Íþróttaiðkun ýtir undir mikilvæg gildi eins og liðsanda, einingu og umburðarlyndi.

Ávinningur af þátttöku í skipulögðu íþrótta- og tómstundastarfi er margvíslegur 

Ánægjuvogin er unnin af Rannsóknum og greiningu (R&g) fyrir ÍSÍ og UMFÍ. Þar er m.a. skoðað hversu ánægðir nemendur sem stunda íþróttir eru með þjálfarann, aðstöðuna, íþróttafélagið og helstu áherslur þjálfarans í starfinu. Einnig eru skoðuð tengsl íþróttaiðkunar við aðra þætti eins og vímuefnaneyslu, námsárangur, andlega og líkamlega heilsu og sjálfsmynd ásamt þátttöku ungmenna af erlendum uppruna í starfinu. Niðurstöður síðustu ára sýna að börn af heimilum þar sem ekki er töluð íslenska eru helmingi ólíklegri til að taka þátt í skipulögðu íþrótta- og tómstundastarfi en þar sem íslenska er eingöngu töluð á heimilinu. Ávinningur þess að auka þátttöku barna og ungmenna af erlendum uppruna í skipulögðu íþrótta- og æskulýðsstarfi er margvíslegur, bæði á þátttakendurna sjálfa, fjölskyldur þeirra og samfélagið allt og því mikilvægt að ná betur til hópsins.

Nánari upplýsingar um verkefnið veitir Ragnhildur Skúladóttir, sviðsstjóri þróunar- og fræðslusviðs ÍSÍ. Netfang: ragnhildur@isi.is og Ragnheiður Sigurðardóttir, landsfulltrúi UMFÍ. Netfang: ragnheidur@umfi.is