Börn hjálpa börnum

Nemendur úr 5. bekk Áslandsskóla taka þátt í söfnuninni BÖRN HJÁLPA BÖRNUM 2017, árlegu söfnunarátaki ABC barnahjálpar í samstarfi við grunnskóla landsins. Forseti Íslands, Hr Guðni Th. Jóhannesson, setti söfnunina formlega af stað í skólanum í dag. Verkefnið tengist með beinum hætti hornstoðum Áslandsskóla og er til þess fallið að efla skilning og virðingu fyrir alheimssamfélaginu.

Söfnunin stendur yfir frá 16. mars til og með 9. apríl og munu börn skólans ganga í hús í sínu hverfi og safna framlögum í sérmerkta söfnunarbauka. Börnin bera höfuðklút “buff” merkt ABC til að auðkenna sig og viðurkenningarskjal fyrir þátttökuna. Þetta er 20. árið sem þessi söfnun grunnskólabarna fer fram og er hún mjög mikilvæg fjáröflun fyrir ABC barnahjálp. Fyrir afrakstur þessara safnana í gegnum árin hafa byggingar fjölmarga skóla og heimila fyrir fátæk börn í þróunarlöndum verið fjármagnaðar. Starfið snýst um það að gefa fátækum börnum tækifæri til menntunar og hjálpa götubörnum til nýs lífs með því að veita þeim heimili og menntun. ABC barnahjálp veitir nemendum frá 3ja ára aldri ókeypis menntun, skólagögn, skólabúning, læknishjálp og mat.

Börn hjálpa börnum verkefnið tengist með beinum hætti hornstoðum Áslandsskóla sem snúa að því að vinna með allar dygðir, efla hnattrænan skilning, efla þjónustu við samfélagið og að gera allt framúrskarandi vel.

Á heimasíðu ABC barnahjálpar www.abc.is má sjá upplýsingar um ABC barnahjálp