Dagur íslenskrar tungu

16. nóvember er dagur íslenskrar tungu og er dagurinn jafnframt fæðingardagur Jónasar Hallgrímssonar skálds. Dagurinn hefur um árabil verið afar hátíðlegur og viðburðaríkur og þá sér í lagi í hafnfirskum leik- og grunnskólum.  Á þessum degi hefst ræktunarhluti Litlu og Stóru upplestrarkeppninnar auk þess sem mörg önnur skemmtileg verkefni eru sett formlega.

Sérstök rækt við upplestur og framsögn

Stóra upplestrarkeppnin fer af stað í 23. sinn í Hafnarfirði sem er vagga verkefnisins. Verkefnið varð með árunum að landsverkefni og er nú svo komið að nær allir skólar á landinu taka árlega þátt. Stóra upplestrarkeppnin er ætluð nemendum í 7. bekkjum grunnskólanna. Keppnin felst í því að allir nemendur leggja sérstaka rækt við upplestur og framsögn fram að lokahátíð keppninnar sem haldin verður í mars eða apríl 2019 í Hafnarborg í Hafnarfirði. Þar mæta til leiks tveir fulltrúar frá hverjum skóla og lesa þar bæði ljóð og texta sem valdir hafa verið af sérstakri nefnd.  Allir nemendur í árganginum fá viðurkenningarskjal í lok ræktunartímabilsins. Á Degi íslenskrar tungu hefst einnig smásagnasamkeppni meðal nemenda í 8. – 10. bekkjum grunnskóla Hafnarfjarðar og verða úrslit kynnt á fyrrgreindri lokahátíð.  Að þessu sinni hafa nemendur val um að skrifa annaðhvort um  galdra eða heilbrigði. Samhliða hefst  samkeppni um mynd á boðskort á lokahátíð Stóru upplestrarkeppninnar. Samkeppnin er árviss í 6. bekkjum og hefur þátttakan ávallt verið mjög góð og mörg listaverkin hafa skilað sér á boðskortin.

Að verða betri í lestri í dag en í gær

Litla upplestrarkeppnin er nýrri af nálinni en sú stóra og er ætluð 4. bekkingum í grunnskólunum. Hún verður nú sett formlega í níunda sinn. Keppnin byggir á sömu hugmyndafræði og sú Stóra en er aðlöguð að yngri nemendum. Hún tekur á framsögn og upplestri en er með aðrar áherslur. Þarna eru allir með og hugtakið keppni í þessu verkefni snýst eingöngu um að verða betri í lestri í dag en í gær.  Í apríl 2019 eru svo haldnar hátíðir innan skólanna og fá foreldrar sérstakt boð auk þess sem nemendur fá allir viðurkenningarskjal.  Þetta þróunarverkefni hófst líka í Hafnarfirði en í dag taka um 3000 nemendur á landsvísu þátt.  Síðastliðið vor voru haldnar 17 lokahátíðir í Litlu upplestrarkeppninni í grunnskólum Hafnarfjarðar. 

Nánari upplýsingar má fá hjá hverjum skóla fyrir sig og hjá skrifstofu fræðslu- og frístundaþjónustu Hafnarfjarðar en á vegum hennar annast Ingibjörg Einarsdóttir , fyrrverandi skrifstofustjóri Skólaskrifstofu Hafnarfjarðar, verkefnisstjórn þessara verkefna.