Diskó, jólaball og jólaganga í jólabænum

Líf og fjör í jólabænum um helgina

Síðasta helgi aðventunnar er við það að renna upp og mun jólabærinn Hafnarfjörður skína skært og skarta sínu allra fegursta um helgina sem jafnframt er síðasta opnunarhelgi Jólaþorpsins í Hafnarfirði. Þúsundir gesta, bæði innlendir og erlendir,  hafa sótt jólabæinn og Jólaþorpið heim síðustu daga og vikur og notið þess að upplifa einstaka og hlýlega stemningu í hjarta Hafnarfjarðar. Nú eru að verða síðustu forvöð til að njóta þetta árið.

Facebooksíða Jólaþorpsins í Hafnarfirði  

Diskó, jólaball, jólaganga og upplifunarhús

Þessi fjórða helgi aðventunnar verður fjölbreytt og viðburðarík. Hellisgerði er opið allan sólarhringinn til upplifa og njóta fram á nýja árið. Jólaþorpið í Hafnarfirði er opið föstudag frá kl. 17-20 og laugardag, á sjálfa Þorláksmessu, frá kl. 13-21. Hinn eini sanni Júlli í JúllaDiskó þeytir skífum fyrir gesti og gangandi á föstudagskvöld og á laugardag kl. 15:30 standa Skjóða og Langleggur fyrir jólaballi á Thorsplani í samstarfi við jólabæinn og stýra þar söng og dansi. Jólasveinar og Grýla verða einnig á ferð og talið afar líklegt að glaðbeitt börnin fá smá glaðning. Hefð hefur skapast fyrir jólagöngu í Hafnarfirði á Þorláksmessu sem endar með ljúfum söng í Jólaþorpinu, í ár þeirra Diljár og Sigurðar Guðmundssonar. Upphafsstaður jólagöngunnar hefur verið breytilegur hin síðustu ár og verður nú í ár gengið frá Fornubúðum á Flensborgarhöfn þar sem verslanir og veitingaaðilar verða með opið fyrir áhugasama í notalegri jólastemningu við smábátahöfnina. Kammerkór Hafnarfjarðar leiðir gönguna með fallegum söng og Björgunarsveit Hafnarfjarðar selur kyndla við Ægi 220 fyrir göngu. Kammerkór Hafnarfjarðar leiðir gönguna með fallegum söng og Björgunarsveit Hafnarfjarðar selur kyndla við Ægi 220 fyrir göngu. Söluaðilar í jólahúsunum í Jólaþorpinu munu taka vel á móti gestum og gangandi alla helgina og í  upplifunarhúsum á Thorsplani verða Trefjar að kynna eldstæðin sín auk þess sem boðið verður upp á drykki frá Töst, Ölvisholti og Mekka.

Jólaþorpið í Hafnarfirði farið að vekja sérstaka athygli erlendis

Inga Hlín Pálsdóttir, framkvæmdastjóri Markaðsstofu höfuðborgarsvæðisins skrifaði, nýverið grein um Jólin jólin alls staðar á höfuðborgarsvæðinu. Þar nefnir hún að Reykjavík hafi nýlega verið valin einn besti áfangastaður í Evrópu til að upplifa jólastemningu og jólamarkaði samkvæmt vefmiðlinum Roadbook en öll sveitarfélögin á höfuðborgarsvæðinu auglýsa sameiginlega undir merki Reykjavíkur – Visti Reykjavík –  gagnvart erlendum ferðamönnum. Þetta er ekki í fyrsta skipti sem Reykjavík er valin ákjósanlegur áfangastaður yfir jól og áramót. Það sem hins vegar var eftirtektarvert í ár var að Jólaþorpið í Hafnarfirði var nefnt sérstaklega í greininni sem stað sem fólk má ekki láta fram hjá sér fara á aðventunni. Fram kemur í skrifum Ingu Hlínar að erlendir ferðamenn gera ekki greinarmun á því hvort þeir eru í Hafnarfirði eða Reykjavík – þó svo að íbúarnir geri það. Það sé mikið verk að reyna að komast yfir að skoða alla þá fallegu staði sem hafa verið skreyttir víðsvegar um höfuðborgarsvæðið og upplifa jólaandann. Ferðamenn koma hingað í síauknu mæli til þess að upplifa jól og áramót og til að kynnast því hvernig Íslendingar fagna þessari einstöku og fallegu hátíð.

Grein Ingu Hlínar í heild