Evrópska nýtnivikan stendur yfir – höfum það umbúðalaust

Þema ársins er umbúðir: Höfum það umbúðalaust!

Dagana 18.-26. nóvember stendur Evrópska Nýtnivikan yfir en markmið átaksins er að hvetja fólk til að draga úr óþarfa neyslu, nýta hluti betur og draga þannig úr myndun úrgangs. Fyrirtæki, sveitarfélög, stofnanir, skólar og almenningur eru hvött til þess að leggja sitt af mörkum til að draga úr notkun einnota umbúða. Aðstandendur verkefnisins Saman gegn sóun hafa útbúið einfalt kynningarefni sem nýtist fyrirtækjum og einstaklingum sem vilja prófa sig áfram í umbúðalausum og fjölnota lausnum í Nýtnivikunni. Efnið er unnið upp úr leiðbeiningum Matvælastofnunar.

Leggjum okkar af mörkum til að skapa hringrásarhagkerfi

Í tilefni Nýtnivikunnar eru sveitarfélög, fyrirtæki, stofnanir, skólar og almenningur hvött til þess að prófa sig áfram í umbúðalausum og fjölnota lausnum í Nýtnivikunni og leggja sitt af mörkum til að skapa hringrásarhagkerfi í samfélaginu, þá ekki síst með því að gefa hugmyndafluginu lausan tauminn, halda viðgerðarkaffi, fyrirlestra eða hvað eina sem styður við minni sóun. Öll þau sem standa fyrir viðburðum eða öðru tengdu nýtnivikunni af einhverju tagi; selja umbúðalaust, kaupa umbúðalaust, neyta umbúðalaust, standa fyrir einhverskonar viðburðum eða hvað annað sem eru hvött til að deila því á Facebook síðu Saman gegn sóun eða Instagram, með því að merkja verkefnið eða senda skilaboð. Þátttakendur og önnur áhugasöm eru hvött til að taka myndir og merkja færslurnar með: #samangegnsoun #nytnivikan #ewwr2022. Umhverfisstofnun heldur úti verkefninu Saman gegn sóun.

Facebooksíða verkefnis

Instagram verkefnis 

 Sóun er ekki lengur í tísku!