Finna hamingjuna í Bæjarbíói á þriðjudagskvöld

Barist gegn einmanaleika á Hamingjudögum

„Einmanaleiki er eins og COVID-faraldur, hann breiðist hratt út og eykst svakalega,“ segir Linda Baldvinsdóttir, samskiptaráðgjafi og markþjálfi. Talið sé að um fimmtungur Íslendinga eldri en 67 ára upplifi sig oft eða stundum einmana. Linda segir að hún finni í ráðgjöf sinni mikið ójafnvægi í nútímalífi fólks á öllum aldri. „Það er bara svo mikið að gera hjá fólki.“ Þetta kemur fram í fréttatilkynningu.

Linda ætlar að sporna fótum við á hamingjukvöldi í Bæjarbíói þriðjudaginn 17. september. Undirtónninn er alvarlegur, einmanaleikinn en hamingjan verður í fyrirrúmi á Hamingjudögum í Hafnarfirði.

„Við ætlum að finna leiðina að hamingjunni. Tengsl, leiðir út úr einmanaleika og ræktun sjálfskærleika verða viðfangsefnin,“ segir hún en viðburðurinn er haldinn á Hamingjudögum í Hafnarfirði, þriðjudaginn 17. september klukkan 20.

Fjöldi góðra fyrirlesara

Kvöldið er þéttskipað flottu fólki sem gaman er að hluta á:

• Aðalbjörg Stefanía Helgadóttir, hjúkrunarfræðingur og höfundur bókarinnar Einmana, fer yfir leiðir út úr einmanaleikanum.
• Theodór Francis Birgisson, ráðgjafi og vikulegur gestur í Bítinu á Bylgjunni, talar um tengsl á léttum nótum.
• Sigga Kling, rithöfundur og fyrirlesari, gefur okkur leiðina að hamingjunni.
• Rósa Guðbjartsdóttir bæjarstjóri opnar og Guðrún Árný söngkona rammar kvöldið inn með því að stýra samsöng og gleði. Sjálf talar Linda Baldvinsdóttir um sjálfsást.

„Við horfum í áttina að heilbrigði. Horfum raunsætt á það að nútíminn elur af sér kvíða og einmanaleika og gefum upp leiðina að hamingjuríkara lífi.“

Hamingjudagar í september

Hamingjudagar í Hafnarfirði standa yfir í september. Þeir eru nú haldnir í annað sinn en hugmyndin kviknaði í fyrra til að bregðast við ákveðnum vísbendingum um að hamingjustuðull landsmanna fari dvínandi. Heilsubærinn Hafnarfjörður stendur fyrir fjölbreyttum viðburðum til að efla jákvætt viðhorf og stuðla að betri andlegri og líkamlegri líðan – auka hamingjuna.

„Við þurfum að elska okkur sjálf, læra að mynda tengsl og vera hluti af samfélagi þar sem við leysum vanda saman,“ segir Linda.

• Hvar? Bæjarbíói
• Hvenær? 17. september
• Klukkan? 20, átta að kvöldi til
• Fyrir? Okkur öll sem viljum lífsgæði og hafa gaman