Fjarðarpósturinn í beinni á aðventunni

Fjarðarpósturinn mun, í samvinnu við Hafnarfjarðarbæ og Jólaþorpið í Hafnarfirði, standa að beinni vefútsendingu sunnudaginn 2. desember. Útsendingin verður frá gamla apótekinu í Hafnarborg og mun meðal annars þekkt listafólk stíga á stokk, svo sem Bubbi Morthens, Guðrún Árný Karlsdóttir, Jón Jónsson og Friðrik Dór. Um 50 manns munu koma fram í þáttunum og sér IKEA um að mubla upp þrjú glæsileg og jólaleg svið fyrir útsendinguna.

Þessi nýstárlega og skemmtilega hugmynd kom upp fyrir nokkrum vikum síðan og eru einstaklingarnir að baki hugmyndarinnar þau Olga Björt Þórðardóttir ritstjóri Fjarðarpóstsins og Þorvarður Goði Valdimarsson hjá framleiðslufyrirtækinu Skjáskoti. Olga Björt og hinn fróði fjölmiðlamaður og Hafnfirðingur, Jónatan Garðarsson, verða þáttastjórnendur og skiptist dagskráin upp í nokkra 45 mínútna þætti yfir daginn. Vefþættirnir, sem byggðir verða upp á viðtölum, skemmtiinnslögum og tónlistarinnslögum, fara samtímis í útsendingu á „like“ síðum allra þátttakenda, Hafnarfjarðarbæjar, Jólaþorpsins og Fjarðarpóstsins og munu því margir Facebook notendur verða varir við hana. Efni þáttanna lifir áfram eftir útsendinguna. 

Hafnarfjarðarbær fagnar þessu framtaki og hlakkar til að sigla inn í aðventuna á þessum nýstárlegu og nýskapandi jólanótum með öllum áhugasömum. 

Ljósmynd: Guðmundur Fylkisson