Flottar ábendingar á kynningarfundi stærri Ásvallalaugar

Stefnt á glæsilegt útisvæði við Ásvallalaug

Um sjötíu mættu á kynningarfund um stækkun útisvæðis Ásvallarlaugar og hugmyndar að nýrri kennslulaug – Og það þrátt fyrir landsleik Íslands og Frakklands í karlaknattspyrnu! Hópurinn gaf sér tíma til að hafa áhrif á uppbyggingu Ásvallalaugar.

Arkitektastofan Batteríið þróaði hugmyndina að svæðinu með umhverfis og framkvæmdaráði. Guðbjörg Oddný Jónasdóttir, formaður ráðsins stýrði fundinum. Davíð Ingi Bustion kynnti niðurstöðuna.

„Sundfélag Hafnarfjarðar er besta sundfélag landsins og Ásvallalaug besta æfingasundlaug landsins. Hvernig mætum við þessu og komum með nýtt sem snýr að afslöppun og rólegheitum?“ spurði hann í upphafi kynningarinnar og útskýrði hugmyndafræðina við þessa frumhönnun svæðisins sem gestir fundarins gátu svo komið með ábendingar um og sagt skoðun sína á.

Útskýrði þessi fyrstu drög

Davíð sagði þau hjá Batteríinu hafa hugsað um að koma með mýkt á móti kassalagaðri innilauginni. Þau hafi þróað aðferð til að búa til flókin form á einfaldan og hagkvæman hátt. Hugmyndin hafi verið að hægt væri að mynda sjónræn tengsl milli sundlaugargesta svo öll gætu hjálpast að við að gæta hvers annars.

„Við horfum til þess að búa til það skemmtilegt svæði að börn leiti ekki annað, þar sem erfiðara er að fylgjast með þeim,“ sagði hann. „Þótt foreldrar fylgist með sínum börnum er mikilvægt að virkja alla til að fylgjast með.“

Hann lýsti því hvernig landslagið væri notað í hönnuninni. Hólar, hæðir og hraun fengju að njóta sín. Greining hafi farið fram. Niðurstaðan:

Mikilvægt að geta fylgst með börnunum

Hann lýsti því hvernig þau hefðu heimsótt 8-10 laugar við hönnun nýja svæðisins við Ásvallalaug.  Þeir hafi sótt innblástur í Lágafellslaug litið til rennibrautarinnar. Foreldrar gætu auðveldlega fylgst með börnunum renna sér. Á teikningunum væri einnig blautgufa, þurrgufa, hraunlaut og  göngustígur

„Það kom mjög skýrt fram að fólk sem er ekki að koma í sund vill geta fylgst með sundlauginni,“ sagði Davíð á fundinum sem haldinn var í sal í Ásvallalaug. „Þetta er hverfislaug og það er mikilvægt að hún þjóni hverfinu.“

Hann fór yfir skuggasvæði.  „Þetta gæti ekki verið betri staðsetning upp á sól að gera,“ sagði hann. „Á sumrin er sól allan daginn.“

Margar spurningar og ábendingar

Ýmsar spurningar vöknuðu á fundinum: Verða pottarnir nógu djúpir? var spurt. Svarið: „Já, algjörlega,“ sagði Davíð og útskýrði að dýptin í þeim væri mismunandi. „Við bjóðum upp á margar og mismunandi upplifanir sem þjóna öllum.“

Spurt var hvort reynt yrði að vernda mosann? „Já samkvæmt skipulagi er hann verndaður. Það er gert með því að girða svæðið af á meðan á framkvæmd stendur.“ Ekki væri hróflað við hrauninu.  „Það verður allt reynt til að raska ekki mosa.“

Spurt var hvort gert yrði við leka í anddyri og svaraði hann að þetta væri tæ tækifæri til að skoða það. Spurt var hvernig hljóðvist yrði háttað? Svarið var að þær kæmu eftirá. „Pælingin er að gróðurinn og grindverk hjálpi til.“

Ábendingar um útikeppnislaug

Ein ábendinganna var að útisundlaugin yrði að vera 8 brauta til að hægt væri að fylgja keppnisreglum. Þá var einnig bent á dýpt hennar og að passa yrði að hún yrði alls ekki styttri en 25 metrar. Davíð og fulltrúar Batterísins sögðu að þetta yrði allt yfirfarið. Ábendingarnar væru góðar. Einnig var spurt hvort hægt væri að hafa stillanlegan botn.

Spurt var um kalda pottinn og hitastigið þar. Einnig um kostnað. Guðbjörg Oddný sagði það næsta skref að greina kostnaðinn betur. Einnig var lögð áhersla á öryggi á framkvæmdatíma. Fundurinn var afar góður. Farið var yfir laugina í heild; búningsklefa og hvernig Hafnfirðingum gæti best verið þjónað.

„Þetta er samfélagslegt verkefni,“ sagði Davíð að lokum. „Það þarf virka þátttöku íbúa. Þið hittið fjölskyldu og vini: Talið um laugina og fáið fólk til að koma með innslag. Við munum skoða allar ábendingar.“

• Sendu ÞÍNA hugmynd á netfangið: hafnarfjordur@hafnarfjordur.is