Formleg útskrift úr fjölþættri heilsueflingu 65+

Formleg útskrift úr verkefninu Fjölþætt heilsuefling 65+ í
Hafnarfirði – leið að farsælum efri árum á vegum Janusar heilsueflingar fór fram
í Hafnarborg þriðjudaginn 2. mars . Þetta er þriðji hópurinn sem nær þessum
áfanga en verkefnið hóf göngu sína í upphafi árs 2018. Hluti af hópi
þátttakenda sem lokið hafa þessu tveggja ára verkefni mættu til útskriftar og
tók á móti útskriftarskírteini.

^{Hluti af hópi þátttakenda sem lokið hafa þessu tveggja ára verkefni mættu til útskriftar og tók á móti útskriftarskírteini.}

Hópurinn hefur æft saman undir handleiðslu Janusar
Guðlaugssonar og hans öfluga teymis frá byrjun árs 2019. Covid-19 hefur sett
sitt strik á framkvæmd og fyrirkomulag en samstilltur hópurinn undir forystu
heilsuþjálfaranna fann leiðir til heilsueflingar þrátt fyrir lokanir og
takmarkanir á tímabilinu. Hluti hópsins ætlar að fá handleiðslu áfram meðan
aðrir halda áfram sjálfir enda sjálfbærni í hreyfingu eftir útskrift eitt af
yfirlýstum markmiðum verkefnisins.

Hópur nýliða tekinn inn í verkefnið fljótlega

Markviss heilsuefling hafnfirskra eldri borgara heldur áfram
og eftir þessa útskrift eru um 180 þátttakendur í verkefninu. Kynningarfundur
fyrir nýjan hóp verður haldinn fljótlega en áhugasamir geta skráð sig í
verkefnið á rafræna kynningu á vef Janusar heilsueflingar – sjá hér. Þeir munu fá ýmsar upplýsingar um daglega
hreyfingu, kynningu á verkefninu á rafrænu formi og verða síðan boðaðir til
formlegrar kynningar á verkefninu þegar þátttakendur 65 ára og eldri hafa verið
bólusettir við Covid-19. Verkefninu fylgir ekki aðeins hreyfing heldur einnig
regluleg fræðsluerindi með áherslu á næringu og ýmsa heilsutengda þætti eins og
núvitund, lyfjanotkun í tengslum við þjálfun og fræðslu um jafnvægi og æfingar
fyrir jafnvægisþjálfun. Með skráningu fá þátttakendur upplýsingar um verkefnið
auk þess að vera boðið á lokaða Facebook síðu hjá nýjum hópi. Þar er og verður
að finna ýmsan heilsutengdan fróðleik fyrir eldri aldurshópa tengt
heilsueflingu.

Heilsuapp aðgengilegt fyrir alla þátttakendur

Janus heilsuefling hlaut styrk frá Tækniþróunarsjóði vegna
þróunar á heilsuappi sem nú er tilbúið til notkunar fyrir alla þátttakendur í
verkefninu. Með þessu nýja smáforriti geta þátttakendur fylgt eftir eigin
þjálfun í gegnum æfingaáætlanir, fylgst með árangri sínum eftir mælingar og
haldið utan um daglega hreyfingu. Smáforritið er hugsað sem eftirfylgni og
áframhaldandi hvatning fyrir hópinn.

Áhersla lögð á aukna virkni eldri borgara í Hafnarfirði

Heilsuefling eldri borgara er liður í heilsustefnu
Hafnarfjarðarbæjar. Heilsustefnan nær til allra samfélagshópa, allra
aldurshópa, allra skóla og stofnana og til sveitarfélagsins í heild. Fjölþætt
heilsuefling 65+ á vegum Janusar heilsueflingar er einn angi af því mikilvæga
verkefni að framfylgja heilsustefnu bæjarins. Heilsubærinn Hafnarfjörður hefur
um árabil lagt áherslu á aukna virkni íbúa sinna, m.a. eldri borgara í Hafnarfirði,
með frístundastyrkjum, félagsstarfi og öðrum sértækum verkefnum. Í andlegri og
líkamlegri hreyfingu býr mikilvæg forvörn sem hefur jákvæð áhrif á lífsgæði og
á almenna þátttöku í lífi og starfi. Þessir þættir geta skapað einstaklingum
aðstæður og andlegan, líkamlegan og félagslegan styrkt til að sinna athöfnum
daglegs lífs lengur og búa lengur í sjálfstæðri búsetu.