Fræ til frístundaheimilanna – heimaræktun virðist ganga vel

Hlusta

Nýlega var fræpökkum með blönduðum kryddjurtum dreift inn á öll heimili í Hafnarfirði. Um var að ræða sumargjöf frá heilsubænum Hafnarfirði sem á að ýta undir grósku, vöxt og vellíðan og kannski ekki síst sameiginlegan áhuga og ánægjulegar samverustundir fjölskyldunnar allrar. Í vikunni fengu öll frístundaheimilin í Hafnarfirði einnig fræpakka að gjöf með hvatningu um ræktun innan veggja heimilanna.

Fjölbreytt starf verður í gangi á vegum frístundaheimilanna sumarið 2021

Ræktun er gefandi verkefni fyrir alla – stóra sem smáa

Um er að ræða fræpakka með fimm fræjum að kryddjurtum til eigin ræktunar. Fræpakkar heilsubæjarins hafa nú verið sendir inn á öll heimili í Hafnarfirði sem heimila fjölpóst og afhentir starfsfólki og nemendum á öllum frístundaheimilum bæjarins. Til stendur að gefa fleiri hópum í Hafnarfirði fræpakka gagngert til að kveikja áhuga á eigin ræktun og þeirri andlegu og líkamlegu næringu sem fylgir slíkri ræktun.

^{Ræktun gengur m.a. vel á leikskólanum Smáralundi sem fékk heimsókn og hvatningu frá bæjarstjóra fyrir rétt um mánuði síðan. Hér má sjá mynd af ræktuninni þar og líklega kominn tími á umpottun.}

^{Rósa Guðbjartsdóttir bæjarstjóri Hafnarfjarðar heimsótti elstu nemendur í heilsueflandi leikskólanum Smáralundi og færði þeim fræ til ræktunar.}

Fékkstu ekki fræpakka heim til þín?

Eitthvað hefur borið á því að heimili í Hafnarfirði virðast ekki hafa fengið fræpakka að gjöf inn um lúguna. Hægt er að nálgast fræpakka í þjónustuver Hafnarfjarðarbæjar á opnunartíma þjónustuversins auk þess sem hægt er að senda beiðni um heimsendingu á pakka á netfangið: hafnarfjordur@hafnarfjordur.is

Viltu taka heimaræktunina skrefinu lengra?

Fjölskyldugarðar Hafnarfjarðar eru opnir öllum bæjarbúum og um að ræða frábært tækifæri fyrir fjölskyldur og einstaklinga í Hafnarfirði til að rækta sitt eigið grænmeti og hugsa um í sumar. Fjölskyldugarðarnir verða opnir á Víðistöðum og á Öldugötu. Kostnaður fyrir einn garð er kr. 1.541.- og fyrir tvo garða kr. 2.568.- Garðarnir afhendast plægðir og hefst úthlutun undir lok maí. Grænmeti eða annað efni til ræktunar er ekki innifalið í verði en aðgengi að vatni og minniháttar verkfærum til staðar. Skráning stendur yfir og fer fram hér – velja þarf sveitarfélag og staðsetningu á fjölskyldugarði sem óskað er eftir (fjölskyldugarður Öldutún/fjölskyldugarður Víðistaðir)

Ég vil sækja um garð takk!

Ævintýrabærinn Hafnarfjörður

Eitt af meginmarkmiðum heilsubæjarins Hafnarfjarðar er að hvetja bæjarbúa til að hlúa vel að andlegri og líkamlegri vellíðan og heilsu. Þannig hefur heilsubærinn brugðið á það ráð að læða reglulega að íbúum heilsueflandi hugmyndum og upplýsingum um þá möguleika sem leynast í upplandi Hafnarfjarðar og í þeim útivistarperlum og -svæðum sem finna má víða um bæinn.

Heilt stafróf af hugmyndum
Litli Ratleikur Hafnarfjarðar
Áhugaverðir staðir í Hafnarfirði
Útivist og náttúra
Sundlaugarnar okkar – frítt fyrir 17 ára og yngri
Bókasafn Hafnarfjarðar
Byggðasafn Hafnarfjarðar – frír aðgangur
Hafnarborg – frír aðgangur

Metnaðarfull heilsustefna fyrir heilsubæinn Hafnarfjörð

Hafnarfjarðarbær gekk til samninga við Embætti landlæknis í mars 2015 um þátttöku í verkefninu Heilsueflandi samfélag og hefur sveitarfélagið í samstarfi við íbúa, starfsmenn og aðra hagsmunaaðila mótað heilsustefnu Hafnarfjarðarbæjar og lagt fram aðgerðaáætlun sem talar beint saman við stefnuna. Í heilsustefnu Hafnarfjarðar er eitt aðalmarkmiðið að hlúa að almennri vellíðan íbúa, andlegri og líkamlegri, á öllum aldri og styrkja og efla sjálfsmynd og góða líðan. Heilsustefnan styður við þá sýn Hafnarfjarðarbæjar til framtíðar að auka vellíðan íbúa bæjarins með fyrirbyggjandi aðgerðum.

Heilsustefna Hafnarfjarðarbæjar