Fræðsla frá Samgöngustofu – verum örugg á ferðinni!

Samgöngustofa hefur gefið út þrjár fræðslumyndir er varða umferðaröryggi og hafa þann mikilvæga tilgang að ýta undir og stuðla að jákvæðri og góðri umferðarmenningu þannig að allir skili sér heilir heim. Fræðslumyndirnar eru allar með íslenskum, ensku og pólskum texta. Verum örugg á ferðinni!

Fræðslumynd um rafhlaupahjól

Vinsældir rafhlaupahjóla hafa aukist mikið að undanförnu hér á landi enda frábær farartæki séu þau notuð rétt. Þau tilheyra flokki reiðhjóla og um þau gilda sömu reglur og um reiðhjól að því undanskyldu að þeim má ekki aka á akbraut. Í þessu myndbandi er farið yfir mikilvæg atriði varðandi notkun þeirra og öryggi.

Fræðslumynd um öryggi barna í bíl
Á hverju ári verða atvik í umferðinni hér á landi þar sem sérstakur öryggisbúnaður kemur í veg fyrir alvarleg slys á börnum. Í þessu myndbandi er farið yfir mikilvæg atriði varðandi öryggi barna í bíl. Öryggi barna er á okkar ábyrgð – það er engin bílferð svo stutt að við getum gefið afslátt af því. 

Fræðslumynd um ljósabúnað

Ökutæki með ljósin kveikt eru mun sýnilegri í umferðinni, auk þess lýsa þau upp endurskin gangandi og hjólandi vegfarenda. Í þessu myndbandi er farið yfir ýmis atriði varðandi ökuljós og mikilvægi þess að öll ljósin á bílnum séu kveikt.

Allar fræðslumyndirnar má finna á vef Samgöngustofu, Youtube, Facebook og í sjónvarpinu á RÚV.