Fulltrúar framtíðarinnar heimsækja bæjarstjóra

Hefð hefur skapast fyrir því að útskriftarhópar leikskóla heimsæki
bæjarstjóra með spurningar og vangaveltur um lífið og tilveruna. Þannig hafa
hópar frá m.a. Arnarbergi og Hlíðarenda heimsótt bæjarstjóra, Rósu Guðbjartsdóttur,
síðustu daga og vikur. Í þessum hópum leynast, að eigin sögn, löggur,
tannlæknar, læknar, forsetar, vísindamenn, hjúkrunarfræðingar, kennarar,
bæjarstjórar og ein sem á sér þann draum að verða drottning.

^{Útskriftarhópur frá Hlíðarenda á skrifstofu bæjarstjóra}

^{Útskriftarhópur frá Arnarberg við TAKK veginn í Hafnarfirði eftir heimsókn til bæjarstjóra}

Ný og krefjandi
verkefni á nýju skólastigi framundan

Þessar heimsóknir eru alltaf jafn skemmtilegar og börnin mjög
áhugasöm um störf bæjarstjóra og verkefni hennar í vinnunni. Bæjarstjóri hefur samhliða fengið boð um
heimsóknir til leikskólanna til að sjá sýningar og afrakstur vinnu útskriftarhópanna
sem lið í útskriftinni og af þeim merka áfanga í lífinu að kveðja fyrsta
skólastigið og takast á við ný og krefjandi verkefni á nýju skólastigi í haust.
Hóparnir koma vel undirbúnir að fund
bæjarstjóra með spurningar og mörg barnanna búin að kanna allar mögulegar
tengingar við bæjarstjóra. Þannig eiga börnin afa og ömmur sem voru með
bæjarstjóra í bekk og foreldra sem þekkja einhvern veginn til Rósu sem
segir tölvuvert til um það hversu lítill og vinalegur bærinn okkar er þrátt
fyrir að vera orðinn ansi stór. Allavega kom það börnunum mjög á óvart að íbúar
væru um 30.000 talsins og starfsmenn um 2.000.

^{Bæjarstjóri heimsótti Fiskibæinn hjá útskriftarhópnum á leikskólanum Hlíðarenda. Bæ sem minnir um margt á Hafnarfjarðarbæ.} 

Ferskar hugmyndir og
pælingar frá flottum börnum

Börnin lýstu yfir ánægju sinni með nýjan ærslabelg og
áhyggjum af því hversu oft belgurinn á Víðistaðatúni er loftlaus. Voru sammála
um að við þyrftum öll að hugsa vel um belgina og fara eftir settum reglum eins
og vera ekki í skóm að hoppa og alls ekki nota belgina fyrir reiðhjól eða
hlaupahjól, hvað þá nokkuð annað. Umræða um umhverfismál hefur verið mikil og krakkarnir
velt fyrir sér hreinsun bæjarins, plokkun og því að henda alls ekki rusli. Þau
vilja öll meina að þau séu að standa sig vel á þessu sviði, beri virðingu fyrir
umhverfinu og ætla sér að gera enn betur.