Fyrirtæki vilja framkvæmdir

Mikil samstaða er meðal fyrirtækja á Hellnahrauni og Selhrauni í Hafnarfirði hvað varðar bætt öryggi og þjónustu á svæðinu. Í kringum 20 aðilar mættu á umræðufund fyrirtækjanna með bæjaryfirvöldum á dögunum þar sem nokkur mál voru rædd varðandi mikilvægar framkvæmdir í þágu öryggis auk óska um betri þjónustu í snjómokstri og samgöngum. Iðnaðarsvæðið þykir eitt af bestu iðnaðarhverfunum á Íslandi í dag og eru stækkunarmöguleikar þar töluverðir. Fyrirtækin þrýsta á framkvæmdir við mislæg gatnamót Reykjanesbrautar og Krýsuvíkurvegar og vilja með því bæta öryggi starfsmanna sinna og viðskiptavina, sem og allra þeirra sem leið eiga um hverfið.

Umræðufundur fulltrúa Hafnarfjarðarbæjar með fyrirtækjum í Hafnarfirði var haldinn í húsnæði Gámaþjónustunnar miðvikudaginn 6. janúar. Til fundar mættu auk fulltrúa Hafnarfjarðarbæjar fulltrúar fyrirtækja sem hafa mikilla hagsmuna að gæta og er umhugað um öryggi og góða þjónustu í og við hverfið. Þörfin fyrir mislæg gatnamót Reykjanesbrautar og Krýsuvíkurvegar brennur helst á stjórnendum og starfsmönnum fyrirtækjanna. Það krafa fyrirtækjanna á svæðinu að framkvæmdir við mislæg gatnamót verði settar í forgang áður en alvarleg slys verða á svæðinu. Bið eftir aðgerðum getur samhliða haft áhrif á vöxt og frekari uppbyggingu þar sem áhugasöm fyrirtæki hafa sett það fyrir sig að byggja upp starfsemi eða flytja á svæðið vegna þessa.

Stækkandi iðnaðarsvæði með mikla umferð stórra bíla

Fjöldi fyrirtækja á Hellnahrauni, Selhrauni og á Völlunum í heild er í dag 156 og ætla má að starfsmenn séu a.m.k. 1700 talsins. Stór hluti starfsmanna þessara fyrirtækja, íbúar á svæðinu sem eru tæplega 5.000 talsins auk gesta og viðskiptavina, sem sækja þjónustu á svæðið, fer um þau T-gatnamót sem um ræðir og sett voru upp sem tímabundin lausn meðan svæðið var í uppbyggingu. Um gatnamótin aka a.m.k. 217.000 stórir flutningabílar á ársgrundvelli eða að meðaltali 93 trukkar á klukkustund (virka daga frá kl. 7:30 – 18) samkvæmt tölum frá sex stórum fyrirtækjum á svæðinu auk annarrar umferðar. Rekstraraðilar á svæðinu hafa lýst yfir þungum áhyggjum af öryggi starfsmanna sinna og vilja að bæjaryfirvöld grípi til viðeigandi þrýstiaðgerða áður en alvarleg slys verða. Fyrirtækin munu fylgja erindi sínu og áhyggjum eftir með bréfi til innanríkisráðuneytisins og annarra viðeigandi aðila.  Vilja þau að framkvæmdalokum vegna mislægra gatnamóta verði flýtt til 2017 og að framkvæmdir fari af stað sem fyrst á árinu 2016.  Verði ekki hægt að grípa til aðgerða strax er það krafa fyrirtækjanna að sett verði upp ljósastýring. Við það yrði umferð hægari og öryggi ykist þó svo að ljóst sé að eina varanlega lausnin séu mislæg gatnamót. Hér er um að ræða einn fjölfarnasta veg landsins og mun umferð um hann aukast enn frekar á næstu misserum. Fyrirtækin skora á sveitarfélagið að fjármagna framkvæmdina sjálft enda séu fordæmi fyrir því og lána Vegagerðinni vegna framkvæmdarinnar. Fyrirtækin vilja jafnvel ganga svo langt að lána fjármagn sjálf til framkvæmdarinnar og tryggja þannig betur öryggi sitt og íbúa í Vallarhverfinu, íbúðahverfi sem næst er iðnaðarsvæðinu og hefur á að skipa einum fjölmennasta grunnskóla landsins.