Góður afgangur af rekstri og skuldaviðmið lækkar

Góður afgangur af rekstri og skuldaviðmið lækkar

Ársreikningur Hafnarfjarðarbæjar fyrir árið 2022 var lagður fram í bæjarráði í dag 4. maí 2023. Rekstrarafgangur fyrir A og B hluta nam 872 milljónum króna á árinu 2022. Niðurstaðan er í samræmi við áætlun. Afgangur af rekstri A hluta nam 255 milljónum króna og er það 126 milljónum króna yfir áætlun. Veltufé frá rekstri A og B hluta nam 1.749 milljónum króna sem svarar til 4,1% af heildartekjum. Skuldaviðmið heldur áfram að lækka og nam 85% í árslok 2022.

Uppbygging mun skila varanlegum auknum útsvarstekjum

,,Afkoma bæjarsjóðs er ívið betri en áætlanir gerðu ráð fyrir og góður afgangur er af rekstrinum. Þetta er mjög jákvæð niðurstaða þar sem rekstur sveitarfélaga er krefjandi um þessar mundir,“ segir Rósa Guðbjartsdóttir bæjarstjóri.  „Í Hafnarfirði á sér stað mikil uppbygging nýrra íbúða- og atvinnuhverfa sem kallar á mikla innviðauppbyggingu. Slíkur vöxtur er kostnaðarsamur til skamms tíma en mikilli fjölgun bæjarbúa og þúsundum nýrra starfa mun síðar fylgja umtalsverð tekjuaukning fyrir bæjarfélagið. Samhliða þessum mikla vexti þarf áfram að gæta aðhalds og tryggja sjálfbæran rekstur grunnþjónustu. Nú, þegar verðbólgan er komin á skrið, kemur sér vel að heildarskuldir sveitarfélagsins hafa lítið aukist að raunvirði frá árinu 2014 eins og skýrlega má sjá á sílækkandi skuldaviðmiði bæjarins. Því má segja að fjárhagur bæjarins sé sífellt að verða traustari,“ segir Rósa Guðbjartsdóttir bæjarstjóri ennfremur.

Rekstrartekjur námu 42,6 milljörðum króna á árinu 2022 og rekstrargjöld voru 37,3 milljarðar króna. Rekstrarniðurstaða fyrir afskriftir og fjármagnsliði var jákvæð um 5,3 milljarða króna. Seldar voru lóðir fyrir 7,4 milljarða króna og voru tekjufærðir 4,9 milljarðar vegna lóðasölu og 2,5 milljarðar til lækkunar á eignfærslum. Fjármagnsgjöld námu 3,0 milljörðum króna og voru liðlega 1,7 milljörðum umfram áætlun vegna neikvæðrar verðlags- og vaxtaþróunar miðað við upphaflegar forsendur.

Skuldaviðmið lækkar úr 101% í 85% á árinu

Endurgreiðslur lána sveitarfélagsins voru 1,1 milljarði króna umfram nýjar lántökur á síðasta ári. Skuldaviðmið Hafnarfjarðarbæjar lækkaði á árinu úr 101% niður í 85% og er það því langt undir 150% skuldaviðmiði samkvæmt reglugerð um fjárhagsleg viðmið og eftirlit með fjármálum sveitarfélaga. Fjárfestingar á árinu 2022 námu 3,3 milljörðum króna sem er 2% lækkun milli ára. Heildareignir í lok árs voru alls 84,6 milljarðar króna og jukust um 11,1 milljarða króna á milli ára. Alls námu heildarskuldir og skuldbindingar sveitarfélagsins 56,5 milljörðum króna. Lífeyrisskuldbindingar nema tæplega þriðjungi heildarskulda og skuldbindinga sveitarfélagsins. Eigið fé nam 28,2 milljörðum króna í árslok og eiginfjárhlutfall var 33,3%.

Íbúar Hafnarfjarðar voru 30.508 hinn 1. desember 2022 samanborið við 29.742 árið áður sem er íbúafjölgun um 766 eða 2,6%.

Ársreikningur Hafnarfjarðarbæjar 2022