Greining gróðursvæða og áhættuminnkandi aðgerðir

Gróðursvæðin á höfuðborgarsvæðinu eru mikið nýtt til útivistar, á sama tíma eru þau uppspretta neysluvatnsins okkar, þar sem eru vatnsverndarsvæði, og hefur því enn frekari áhrif á svæðið ef þau brenna og huga þarf enn frekar að slökkvistarfi. Röskun á veðurkerfum hefur margvísleg áhrif á samfélagið. Ein birtingarmyndin eru færri rigningardagar en meiri ákefð, sem veldur því að aðstæður sem áður hafa ekki komið upp líkt og gerðist vorið 2021, þegar gróðureldur brann í Heiðmörk, og víðar á landinu, og óvissustigi almannavarna var lýst yfir í fyrsta sinn á landinu sökum gróðurelda. Það vor hófst samstarf helstu aðila sem koma að gróðursvæðunum á höfuðborgarsvæðinu. Sett voru upp skilti sem bönnuðu meðferð með eldi og sms girðingar voru settar upp á gróðursvæðum til að banna fólki meðhöndlun elds sökum aðstæðna. Nú hafa ýmsir aðilar farið í töluverða forvarnarvinnu, bætt við búnaði og eftirliti til að fylgjast með þegar aðstæður verða aftur eins og þær voru vorið 2021, þá mikill þurrkur og nýr gróður ekki farinn að taka við sér.