Hafnarfjarðarbær fær viðurkenningu Jafnvægisvogar

Hafnarfjarðarbær fær viðurkenningu Jafnvægisvogar FKA 2022

Hafnarfjarðarbær er í hópi þeirra fyrirtækja og opinberu aðila sem hlutu viðurkenningu Jafnvægisvogar FKA, hreyfiaflsverkefnis FKA, árið 2022 en hana hljóta þeir sem hafa náð að jafna hlutfall kynja í efsta lagi í a.m.k. 40/60. Ráðstefnan Jafnrétti er ákvörðun og viðurkenningarhátíð fóru fram í beinni útsendingu á RÚV í gær. 59 fyrirtæki, 6 sveitarfélög og 11 opinberir aðilar hlutu viðurkenningu í ár. Á árinu 2022 hafa 57 nýir þátttakendur bæst í hóp þeirra sem taka þátt í Jafnvægisvoginni.

Hafnarfjarðarbær var í hópi þeirra sveitarfélaga og fyrirtækja sem árið 2019 skrifuðu undir viljayfirlýsingu um að vinna að markmiðum Jafnvægisvogar FKA (Félags kvenna í atvinnulífinu) og beita sér fyrir auknu kynjajafnvægi innan sinna vébanda næstu fimm árin.

^{59 fyrirtæki, 6 sveitarfélög og 11 opinberir aðilar hlutu viðurkenningu í ár. Kristín Sigrún Guðmundsdóttir mannauðsstjóri Hafnarfjarðarbæjar tók á móti viðurkenningunni fyrir hönd sveitarfélagsins.}

Tilkynning á vef FKA

„Það er óhætt að segja þessi viðurkenning sé hrós í hnappagat sveitarfélagsins og afrakstur markvissrar innleiðingar á jafnræði, jafnvægi og fjölbreytileika innan mannauðs Hafnarfjarðarbæjar. Á aðeins þremur árum höfum við náð að jafna hlutfall kynja í efsta lagi sem verður að teljast góður árangur sérstaklega í ljósi þess að skólamálin og félagsmálin vega þungt innan sveitarfélagsins og þar hafa konur verið í miklum meirihluta í stjórnendastöðum. Við erum ánægð með árangurinn og munu halda vegferðinni ótrauð áfram“, segir Rósa Guðbjartsdóttir bæjarstjóri Hafnarfjarðar.

Frábær árangur á meðal þátttakenda í Jafnvægisvog FKA

Jafnvægisvogin veitti viðurkenningar til fimmtíu og níu fyrirtækja, sex sveitarfélaga og ellefu opinberra aðila úr hópi þeirra 209 þátttakenda sem hafa undirritað viljayfirlýsingu. Markmið Jafnvægisvogar um 40/60 kynjahlutfall í efsta stjórnendalagi var haft til hliðsjónar við matið. Stór hluti þeirra þátttakenda sem hafa skrifað undir viljayfirlýsingu Jafnvægisvogarinnar hafa náð góðum árangri á þessu sviði og fjölgaði þeim þátttakendum sem hafa náð markmiðunum um 23 á milli ára.

„Það hefur verið gaman að fylgjast með Jafnvægisvoginni stækka undanfarin ár og jafnréttismál verða að mikilvægu forgangsmáli hjá okkar þátttakendum. Þátttakendur taka stoltir við viðurkenningu Jafnvægisvogarinnar og hafa verið duglegir að vekja athygli á jafnréttismálum innan sinna vinnustaða með ýmsum hætti. Því miður eru konur eingöngu 24% framkvæmdastjóra fyrirtækja á Íslandi og hefur hlutfallið eingöngu farið upp um 3% á síðustu tíu árum. Ég er þó bjartsýn á að hlutfallið muni fara hraðar upp á næstu árum með aukinni vitundarvakningu meðal þeirra sem taka ákvörðun um ráðningar“ segir Thelma Kristín Kvaran, verkefnastjóri Jafnvægisvogarinnar.

Jafnrétti hefur bein áhrif á umhverfið

Á ráðstefnu Jafnvægisvogarinnar 2020 var kynntur nýr Jafnréttislundur FKA, sem Skógræktarfélag Reykjavíkur útvegaði Jafnvægisvoginni. Lundurinn er staðsettur við aðalinnganginn í Heiðmörk, Vífilsstaðamegin, og er það fyrsta sem fólk sér þegar það gengur inn í Heiðmörk. Í ár voru gróðursett 76 tré, eitt fyrir hvern viðurkenningarhafa árið 2022. Valdar voru margar tegundir af trjám sem tákn um þann fjölbreytileika sem Jafnvægisvogin er að stuðla að. Alls er búið að setja niður 173 tré í Jafnréttislundi á síðustu 3 árum. Það er markmið Jafnvægisvogarinnar að endurtaka þetta árlega og væri ánægjulegt að sjá hlíðina fyllast á næstu árum, með auknu jafnrétti.

Aðgengileg og skýr framsetning upplýsinga

Jafnvægisvogin heldur úti mælaborði sem er ætlað að halda utan um tölfræðilegar upplýsingar um jafnrétti. Þannig er hægt að tryggja aðhald og góða frammistöðu. Í mælaborði Jafnvægisvogarinnar koma fram allar helstu opinberar upplýsingar um stöðu stjórnenda í íslensku atvinnulífi og innan hins opinbera og þær gerðar aðgengilegar á einfaldan og skýran hátt.

Bætist í hóp fyrirtækja og sveitarfélag sem sjá sér hag í að vinna með Jafnvægisvoginni

Mikill vilji hefur verið hjá fyrirtækjum, sveitarfélögum og opinberum aðilum að vinna að jafnréttismálum þegar kemur að æðstu stjórnendum. Á árinu undirrituðu alls fjörutíu og sjö fyrirtæki, tvö sveitarfélög og átta opinberir aðilar viljayfirlýsingu um að vinna að markmiðum Jafnvægisvogarinnar og bættust þar með í hóp þeirra sem undirrituðu á síðustu árum. Þátttakendur eru orðnir 209 þátttakendur talsins. Fjölbreyttur mannauður hefur jákvæð áhrif á afkomu fyrirtækja sem og starfsánægju og frammistöðu í starfi, stuðlar að betri ákvarðanatöku og aukinni verðmætasköpun þar sem nýsköpun og vöxtur verður frekar í hópi fólks með ólíkar skoðanir og bakgrunn. Þátttakendur hafa þannig sýnt í verki að þau vilja virkja allan mannauðinn.

Eftirfarandi hlutu viðurkenningu Jafnvægisvogarinnar í ár:

1. 1912
2. A4
3. AGR Dynamics
4. Akraneskaupstaður
5. Atmonia
6. AwareGO
7. BL
8. Blue Lagoon
9. BYKO
10. Coca-Cola European Partners
11. Creditinfo
12. Dagar
13. Deloitte
14. dk hugbúnaður
15. Einingaverksmiðjan
16. Elkem Ísland
17. ELKO
18. Ernst & Young
19. Fangelsismálastofnun
20. Félagsbústaðir
21. Fjallabyggð
22. Fly Play
23. Framkvæmdasýslan-Ríkiseignir
24. GG verk ehf
25. Guðmundur Arason
26. Hafnarfjarðarbær
27. Hagstofa Íslands
28. Háskóli Íslands
29. Heilbrigðisstofnun Austurlands
30. Heilbrigðisstofnun Suðurlands
31. Hirzlan
32. HS Orka
33. indó sparisjóður
34. Isavia
35. Íslandsbanki
36. Íslandshótel
37. Íslandspóstur
38. Krónan
39. Landgræðslan
40. Landsvirkjun
41. Lyf og heilsa
42. Lyfja
43. Lögreglan á höfuðborgarsvæðinu
44. Mannvit
45. Miklatorg
46. Múlaþing
47. Norðurál Grundartanga
48. Norðurorka
49. Nova
50. Olís
51. Orka náttúrunnar
52. Orkan
53. Orkusalan
54. Orkuveita Reykjavíkur
55. Ósar – lífæð heilbrigðis
56. Pipar\TBWA
57. Rafal
58. Rangárþing ytra
59. Reykjanesbær
60. Rio Tinto á Íslandi
61. SaltPay
62. Samkaup
63. Sjóvá
64. Skatturinn
65. Sólar
66. Taktikal
67. Tryggingastofnun
68. Tryggja
69. Vátryggingafélag Íslands
70. Vegagerðin
71. Veitur
72. Veritas
73. Vörður tryggingar
74. Vinnueftirlitið
75. Wise
76. Ölfusborg

Jafnrétti er ákvörðun | Fréttir | Hafnarfjörður (hafnarfjordur.is)