Hafró formlega flutt til Hafnarfjarðar

Við bjóðum starfsfólk og gesti Hafrannsóknarstofnunar velkomna til Hafnarfjarðar!

Hafrannsóknarstofnun (Hafró) er flutt til Hafnarfjarðar. Samningur um nýtt húsnæði var undirritaður í febrúar 2018 og fyrsta skóflustungan tekin í mars sama ár. Nú fyrir helgi var húsnæðið að Fornubúðum 5 opnað formlega með táknrænum hætti þar sem forseti Íslands, sjávarútvegsráðherra, ráðuneytisstjóri, forstjóri, starfsfólk stofnunarinnar og fleiri gestir kvöddu fyrri heimkynni Hafró að Skúlagötu 4 og sigldu á rannsóknarskipunum, Árna Friðrikssyni og Bjarna Sæmundssyni, frá Faxagarði í nýja heimahöfn í Hafnarfirði.

Sólin tók á móti hópnum í Hafnarfirði

Bæjarstjórn Hafnarfjarðar, byggingaraðilar húsnæðis, hópur heimamanna og aðrir gestir tóku glaðbeitt á móti rannsóknarskipunum tveimur og gestum þeirra síðdegis síðastliðinn föstudag. Forseti Íslands, Guðni Th. Jóhannesson, klippti á borða þegar komið var að bryggju við Fornubúðir 5. Í móttökuathöfn á bryggjunni stigu á svið með stutt erindi; sem einkenndust af sögu, tækni og vísindum og þeim tækifærum sem við blasa í nýju húsnæði á nýjum stað; forseti Íslands, Kristján Þór Júlíusson sjávarútvegsráðherra, Rósa Guðbjartsdóttir bæjarstjóri Hafnarfjarðar, Sigurður Guðjónsson forstjóri Hafró og Jón Rúnar Halldórsson hjá eignarhaldsfélaginu Fornubúðum ehf.

Sjá fleiri myndir á Facebook síðu Hafnarfjarðarbæjar

^{Rósa Guðbjartsdóttir bæjarstjóri býður hér Sigurð Guðjónsson forstjóra Hafrannsóknarstofnunar og allt hans fólk velkomið til Hafnarfjarðar.  Færði honum blóm og gjöf frá bænum.} 

Við flutning Hafró til Hafnarfjarðar er öll starfsemi stofnunarinnar komin undir eitt þak í nýtt og umhverfisvænt húsnæði á nýjum stað og opnar hvorutveggja á mikla möguleika og tækifæri í frekari vexti og þróun. Þegar hafa komið upp hugmyndir um að koma þar á fót þekkingarsetri um hafið og heimskautin, auk þess sem sprota- og þekkingarfyrirtæki í sjávarútvegi hafa líst miklum áhuga að komast í nábýli við stofnunina með samstarf í huga.

Tækifæri í takt við tíðaranda

Fyrirséð er mikil og jákvæð uppbygging á Flensborgarhöfn og Óseyrarsvæði eins og rammaskipulag og þar með stefnumótandi framtíðarsýn um heildaryfirbragð hafnarsvæðisins sýnir. Síðustu mánuði og ár hefur áhugi á ýmis konar starfsemi og þjónustu á svæðinu vaxið til muna og hafa frumkvöðlar, listafólk og hönnuðir komið sér upp vinnustofum og aðstöðu hvoru tveggja við Fornubúðir og í skapandi umhverfi Íshúss Hafnarfjarðar. Fyrirséð er að þessi skapandi og áhugaverða uppbygging haldi áfram. 

Sjá upplýsingasíðu um Flensborgarhöfn og Óseyrarsvæði