Háskóli Íslands í Menntasetrið við Lækinn

Hafnarfjarðarbær og Háskóli Íslands hafa komist að
samkomulagi um að skólinn komi upp aðstöðu fyrir tæknifræðinám í Menntasetrinu
við Lækinn nú í haust. Bæjarráð samþykkti samninginn á fundi sínum í morgun. Tæknifræðikennslan
mun hefjast af fullum þunga núna í haust hér í Hafnarfirði en námið hafði áður
verið í samstarfi við Keili í Ásbrú á Reykjanesi.

Hjá Keili hefur nám tengt flugi og ferðaþjónustu vaxið á
undanförnum árum og á sama tíma einnig kennsla í tæknifræði. Háskóli Íslands sá
tækifæri í því að flytja tæknifræðikennsluna og helst nær höfuðborginni.
Nemendurnir koma bæði frá höfuðborgarsvæðinu og Suðurnesjunum og því þótti
Hafnarfjörður ákjósanleg staðsetning. Eftir að erindi frá Háskólanum um
mögulegt húsnæði í Menntasetrinu við Lækinn barst í sumar, fól bæjarráð
bæjarstjóra að ganga til viðræðna við forsvarsmenn Háskólans hið fyrsta.

,,Þetta er mjög spennandi þróun í námsframboði í Hafnarfirði. Við erum nú þegar með Tækniskólann hér í bænum og fögnum því mjög að fá tæknifræðinám Háskóla Íslands líka. Aukið framboð til náms og ný menntastofnun af þessu tagi mun án efa hafa jákvæð áhrif á mannlíf í Hafnarfirði, auðvelda hafnfirskum nemendum að hefja tæknifræðinám og svo er ánægjulegt að gamli Lækjarskóli haldi áfram að gegna sínu hlutverki sem menntasetur,“ segir  Rósa Guðbjartsdóttir bæjarstjóri um komu
Háskólans til Hafnarfjarðar. 

Kennslan fer fram á þriðju hæð Menntasetursins og eins og
áður sagði hefst hún strax á þessu skólaári. Öll kennslan nema efnafræði mun
fara þar fram strax í upphafi en stefnt er að því að koma upp aðstöðu fyrir slíka
kennslu í framhaldinu þannig að allt nám tæknifræðinnar verði kennt í
Hafnarfirði. Um það bil 50 nemendur hefja nám í haust en með aðstöðunni í
Menntasetrinu við Lækinn verður hægt að efla námið og fjölga nemendum.