Haustsýning Hafnarborgar – kallað eftir tillögum

Eins og undanfarin ár gefst sýningarstjórum tækifæri til
að senda inn tillögur að sýningu í Hafnarborg haustið 2021. Sýningin Villiblómið
sem nú stendur yfir í safninu var valin úr athyglisverðum tillögum sem
sendar voru inn á síðasta ári.  Frestur til að skila inn tillögum rennur út á miðnætti sunnudaginn 25. október 2020.

Markmiðið með því að óska eftir innsendum
tillögum er að fá tækifæri til að velja til samstarfs sýningarstjóra sem leggur
fram áhugaverða tillögu að sýningu en jafnframt að kalla til leiks nýtt fólk.
Þannig er sérstaklega hugað að því að veita tækifæri sýningarstjórum með
stuttan feril að baki. Það hefur sýnt sig að fyllsta ástæða er til að halda úti
slíku verkefni, en út frá því hafa orðið til fjölbreyttar og áhugaverðar
sýningar sem vakið hafa athygli og verið vel sóttar.

Óskað er eftir hugmyndum að samsýningum

Óskað er eftir hugmyndum að samsýningum þar sem
viðfangsefni, vinnuaðferð eða aðrar hugmyndir tengja verk listamanna en einnig
koma til greina sýningar sem fela í sér greiningu eða sýn á verk ákveðins
listamanns. Jafnt koma til greina sýningar á verkum samtímalistamanna og
sýningar sem fela í sér sögulega greiningu. 

Haustsýningaröðin hóf göngu sína árið 2011

Árið 2011 hóf haustsýningaröðin göngu sína með sýningunni
Í bili sem unnin
var af Ólöfu Gerði Sigfúsdóttur mannfræðingi, 2012 var sett upp sýningin SKIA í sýningarstjórn
Guðna Tómassonar listsagnfræðings. Anna María Bogadóttir
menningarfræðingur og arkitekt sýningarstýrði sýningunni Vísar – húsin í húsinu
árið 2013 og á árinu 2014 var hugmynd Helgu Þórsdóttur, menningarfræðings og
myndlistarmanns, að sýningunni Rás
valin úr áhugaverðum tillögum. Haustið 2015 voru það listfræðingarnir
Aðalheiður Valgeirsdóttir og Aldís Arnardóttir með sýninguna Heimurinn án okkar. Árið 2016,
var tillaga hönnunartvíeykisins TOS fyrir valinu, sem er skipað þeim Hildi
Steinþórsdóttur og Rúnu Thors, með sýninguna Tilraun
– leir og fleira, 2017 var sýningin Málverk – ekki miðill sett upp undir
sýningarstjórn Jóhannesar Dagssonar, 2018 sýningin Allra veðra von sem Marta Sigríður
Pétursdóttir sýningarstýrði og árið 2019 var sýningarhugmynd Andreu
Arnarsdóttur og Starkaðar Sigurðssonar fyrir valinu sem bar titilinn Allt á sama tíma. Í ár er
það sýningin Villiblómið
sem var valin úr hópi innsendra hugmynda, á sýningunni búa listamenn frá
Íslandi og Kanada til rými fyrir samruna umhverfisaktívisma, margbreytilegra
vistkerfa, femínisma og handverks innan samtímalistarinnar. Sýningin stendur
til 25. október.

Hafnarborg vill skapa jarðveg fyrir áhugaverðar hugmyndir

Með haustsýningaröðinni vill Hafnarborg skapa farveg
fyrir áhugaverðar hugmyndir þannig að safnið verði vettvangur þar sem myndlist
fær notið sín, mótuð af fjölbreyttum viðhorfum og viðfangsefnum. Sýningarnar og
málþing sem skipulögð hafa verið samhliða þeim hafa skapað markverðan vettvang
umræðna og þróunar í Hafnarborg.

Sendið tillögur á netfangið hafnarborg@hafnarfjordur.is

Merkið póstinn Haust2021.

Nánari upplýsingar í síma Hafnarborgar 585 5790 og á
heimasíðu safnsins www.hafnarborg.is