HEIMA 2022 er í kvöld!

HEIMA er haldin í sjöunda sinn í Hafnarfirði í kvöld en hátíðin var fyrst haldin síðasta vetrardag 2014. Engin hátíð var haldin 2020 og 2021 en nú er komið að HEIMA 2022 – síðasta vetrardag, 20. apríl. Listamennirnir eru þrettán og allir koma fram tvisvar í sitthvoru HEIMA-húsinu í miðbænum. Þrettán fjölskyldur bjóða heim í stofu í ár í hjarta Hafnarfjarðar. 

Einstök og öðruvísi tónlistarhátíð 

HEIMA-hátíðin hefur náð að festa sig í sessi sem skemmtileg og einstök tónlistarhátíð þar sem boðið er upp á öðruvísi upplifun og meiri nánd en tónleikagestir og listamenn eiga að venjast almennt.Hafnfirðingar munu sem fyrr opna heimili sín í miðbæ Hafnarfjarðar og í hverju húsi spila tveir mismunandi listamenn eða hljómsveitir. Fríkirkjan í Hafnarfirði mun einnig opna dyr sínar eins og undanfarin ár fyrir HEIMA-fólki auk þess sem sviðið í Bæjarbíói verður notað sem bætir enn á fjölbreytileikann.

Þrettán heimili og þrettán listamenn 

Listamennirnir eru þrettán og allir koma fram tvisvar í sitthvoru HEIMA-húsinu í miðbænum. Það eru ekki allir að spila á sama tíma þannig að þeir sem eru duglegastir að rölta milli húsa sjá flest atriði. Fyrstu HEIMA-tónleikarnir hefjast um kl. 20.00. og þeim síðustu lýkur um kl. 23.00. Rás 2 verður á staðnum og mun útvarpa hluta dagskrárinnar.Guðrún Árný og Egill Rafnsson munu svo sjá um sing-along eftirpartíið í Bæjarbíói sem hefst klukkan 23.15 og stendur í amk. klukkustund.

Þeir sem koma fram á HEIMA 2022 eru:

• The Vintage Caravan
• Viktoría Tómasdóttir
• Dúkkulísurnar
• Margrét Eir & Thin Jim
• Guðrún Árný & Egill Rafnsson
• Gugusar
• Sigurður Guðmundsson
• Krummi
• Systur (Eyþórsdætur)
• Flott
• Hildur Vala
• Kristján Jóhannsson
• BlazRoca ásamt Blaffa

Nánari upplýsingar um HEIMA á Facebook

Miðasala á HEIMA á tix.is