Heimar og himingeimar: Barist við Darth Vader í Hafnarfirði

Heimar og himingeimar í Hafnarfirði!

Búist er við hundruð ef ekki á annað þúsund þegar gestum og gagnandi er boðið að stíga inn í ævintýraheim búninga- og leikjasamkomunnar Heimar og himingeimar. Hátíðin er haldin á Bókasafni Hafnarfjarðar 30. ágúst til 1. september.

„Búningabransinn snýst um að gefa skít í staðalímyndir. Stíga úr raunveruleikanum og inn í ímyndaðan heim, mótaðan og sniðinn eins og hver og einn kýs,“ segir Unnur Helga Möller, verkefnastjóri viðburða hjá Bókasafni Hafnarfjarðar. Hún er stórhuga og ætlar með hópunum sjö sem standa að hátíðinni að endurbyggja Star Wars geimskip á fyrstu hæðinni og setja upp fantasíukrá á þeirri þriðju. Og það er ekki allt.

„Rimmugýgur verður fyrir utan bókasafnið með víkingabardaga, Hema Reykjavík verður með sögulegar skylmingar og Geislasverðafélagið mætir með geislasverðin sín. Þau ætla svo að slást við Darth Vader, sem fólk þekkir náttúrulega úr Star Wars,“ segir Unnur Helga.

Þriggja daga hátíð

Viðburðurinn stendur í þrjá daga. Margt að sjá og sem hægt er að taka þátt í. Smiðjur verða alla dagana. Þar má m.a. læra að búa til sverð og búninga, taka cosplay-ljósmyndir og skrifa í miðaldastíl. Keppt verður um bestu búningana í Cosplay þann 31. ágúst. Yfirdómari er sigurvegari NCC Iceland keppninnar, Jessica Chambers, sem dæmir í þremur flokkum, ungliða-, opnum og fyrir lengra komna.

„Keppnin er opin öllum og flokkarnir þrír til að tryggja sanngjarnt mat á mismunandi stigum kunnáttu og reynslu,“ segir Unnur Helga.

Unnur Helga Möller er hryggjarstykkið í hátíðinni Heimar og himingeimar sem haldnir verða á Bókasafni Hafnarfjarðar 31. ágúst til 1. september. Sjón er sögu ríkari.

Smiðjur fyrir galla og vopn

Boffervopnasmiðja verður sett upp, en þau eru einnig kölluð frauðvopn eða larp-vopn. Þá verður hægt að taka þátt í smiðju þar sem Larp-galli er gerður á korter. „Hægt er að skrá sig og stíga á vígvöll þar sem barist er með larp-vopnunum, bæði fyrir börn og fullorðna,“ segir hún.

Unnur segir búningasamfélagið eitt það skemmtilegasta sem til er. Stórir hópar eigi sér annað líf í búningunum enda stígi það úr raunveruleikanum inn í veruleika sem sé  mótaður af þeirra hugmyndum.

Fólk finnur sinn innri mann

„Búningabransinn snýst um að gefa skít í staðalímyndir,“ segir hún. „Og þú þarft ekki að vera í nördadóti eins og við hin, ef þú vilt vera Kate Bush eða beint úr Flashdance er það í góðu lagi. Lífið er leiksvið, fötin skapa manninn, og maðurinn er aldrei of gamall til að leika sér,“ segir hún en sjálf hefur hún spilað spunaspil frá sextán ára aldri og verið í búningabransanum í um áratug.

„Þetta er svo gaman og til hvers að gera eitthvað ef það er ekki gaman? “ spyr Unnur.

„Komdu og vertu með! Við ætlum að missa okkur í öllu sem er skemmtilegt við búninga: Allt frá kvikmyndabúningum til Larp-fantasíuklæðnaðs, til sögulegar endursköpunar. Japanskt cosplay, leikmunagerð, buffer-vopn, sögulegar skylmingar, geislasverðaskylmingar …bara allt og þú ert velkominn með!“

Opið verður:

• Föstudag 30.08.24 kl. 17:00-20:00
• Laugardag 31.08.24 kl. 11:00-20:00
• Sunnudag 01.09.24 kl. 11:00-14:00

Og að sjálfsögðu þarf ekki að taka fram að allir, já, öll eru hvött til að mæta í búningum!

• Boffersmiðja hér
• Cosplay-keppni hér
• Cosplay-posing hér
• Fléttugerð hér
• Boffersmiðja hér
• Miðaldaskrautskrift hér
• Larp-galli á korteri hér