Hjarta Hafnarfjarðar er nú bleikt

Bleikur október er fyrir okkur

„Við erum bleikar. Við höfum greinst, verið gripnar eða staðið með okkar fólki í veikindum. Nú er Bleikur október og því hvetjum við allar til að fylgjast með sér, fara í skimun ­– Það einfaldar lífið,“ segja þær Hulda Þórarinsdóttir, Helga Snorradóttir, Kristín Jónsdóttir, Þórey Ósk Sæmundsdóttir, Jenný Dagbjört Gunnardóttir og Karítas Guðmundsdóttir, allar á mennta- og lýðheilsusvið bæjarins hér með Gunnhildi Örnu Gunnarsdóttur og Rósu Guðbjartsdóttur bæjarstjóra. Já, í þessum hópi eru sigurvegarar sem vita hversu mikilvægt er að fylgjast með sér sem og aðstandendur.

Árverknisátak gegn krabbameinum

Bleikur október er árlegi árverknistími tileinkaður baráttunni gegn krabbameinum í konum. Í ár beinir Krabbameinsfélagið athyglinni að aðstandendum undir slagorðinu „Þú breytir öllu”. Á vef Krabbameinsfélagsins segir: „Við viljum þakka þeim sem hvorki búast við né ætlast til að fá þakkir, fólkinu sem er svo mikilvægt en á það til það að gleymast – aðstandendum.“

Á síðunni er einnig greint frá því að á Íslandi greinist að meðaltali 971 kona með krabbamein á ári hverju. „Sem betur fer eru stöðugar framfarir í greiningu og meðferð sem leiða til þess að fleiri og fleiri lifa af. Í árslok 2023 voru 10.070 konur á lífi sem fengið höfðu krabbamein en því miður eru krabbamein enn stærsti orsakavaldur ótímabærra dauðsfalla á Íslandi og á hverju ári missum við að meðaltali um 306 konur úr krabbameinum.“

Bleiki dagurinn 23. október

Þriðjudaginn, 1. október hófst þetta árlega árvekni- og fjáröflunarátak Krabbameinsfélagsins tileinkað baráttunni gegn krabbameinum hjá konum. Þann 23. október klæðumst við svo bleiku.