Hringinn í kringum landið í nóvember

Starfsfólk Hafnarfjarðarbæjar hefur sett sér það markmið að ganga hringinn í kringum landið í nóvember. Haldið er utan um þátttöku í verkefninu á innri samskiptamiðli starfsfólks en starfsfólk gengur sjálft eða í litlum hópum og sendir inn upplýsingar um gengna kílómetra. Daglega er vegalengdin tekin saman til að sjá hve hópurinn er kominn langt áleiðis.

Hópurinn er “staddur” í Berufirði í Múlaþingi 

Rúmlega hundrað eru skráðir til þátttöku og eftir fyrstu vikuna er hringvegurinn meira en hálfnaður. Gengnir hafa verið samtals 779 km og hópurinn er því „staddur“ í Berufirði í Múlaþingi.

^{Eftir fyrstu vikuna er leiðin meira en hálfnuð og gengnir hafa verið samtals 779 km. Hópurinn er því „staddur“ í Berufirði í Múlaþingi ca. á þeim stað þar sem síðasti malarkaflinn á þjóðvegi 1 var malbikaður 2019 með útsýni yfir Búlandstind og Djúpivogur handan við hornið.}

Ferðalagið hefur gengið c.a. svona til þessa: 

• Miðvikudagurinn 4. nóvember. Hópurinn komst að Hafnarfjalli og hafði þá lagt 65KM að baki.
• Fimmtudagurinn 5. nóvember. Hópurinn nokkurn veginn kominn á áætlun og rétt ókominn í Víðigerði. Hafði þá samtals lagt 209KM að baki.
• Föstudagurinn 6. nóvember. Þátttakan tók kipp og hópurinn staddur við Stórutjarnarskóla.  Stytti sér óvart leið í gegnum Vaðlaheiðargöngin enda spenntur fyrir nýju göngunum en þar má náttúrulega alls ekki ganga né hjóla! Styttingin verður unnin upp síðar.  
• Laugardagurinn 7. nóvember. Hópurinn kominn langleiðina að Egilsstöðum og var staddur við fossinn Ytri-Rjúkanda sem er einn af perlum Fljótsdalshéraðs við hringveginn á Jökuldal og er vel sýnilegur af þjóðveginum.

Fjölmargir hafa deilt myndum af áhugaverðum stöðum og gönguleiðum með samstarfsfólki sínu og meðfylgjandi eru nokkrar myndir sem starfsfólk hefur tekið á ferðum sínum.

^{Guðbjörg Dögg Gunnarsdóttir skólastjóri Lækjarskóla gekk um Kársnesið.}

^{Bryndís Halldórsdóttir skóla- og frístundaliði í Víðistaðaskóla gekk um Elliðaárdalinn.}

^{Andri Ómarsson verkefnastjóri í menningarmálum ætlaði á Helgafell en endaði í Búrfellsgjá í Garðabæ.}

^{Anna Sigurborg Harðardóttir leikskólastjóri gekk fram hjá þessu fallega verki eftir Ingvar Björn við Víðistaðatún .}

^{Ásta Eyjólfsdóttir skóla- og frístundaliði í Setbergsskóla rakst á þessi sumarblóm á göngu sinni sem lifa þó svo það sé kominn nóvember.}

^{Árdís Ármannsdóttir samskiptastjóri tók daginn snemma og gekk á snjóhvíta Esjuna}

Hringurinn í kringum landið heldur áfram og alveg spurning hvort Vestfirðirnir verði mögulega teknir líka núna í nóvember. Það stefnir allt í það!