Hugmyndir um nútímalegt bókasafn í Firði

Horft til framtíðar með hugmyndum um
nútímalegt bókasafn

Bæjarstjórn Hafnarfjarðar tók fyrir á fundi sínum í dag hugmyndir
um að flytja Bókasafn Hafnarfjarðar úr núverandi húsnæði að Strandgötu 1 í nýtt
húsnæði að Strandgötu 26-30. Vilji er fyrir því að gera skuldbindandi
samkomulag milli 220 Fjarðar og Hafnarfjarðarbæjar sem byggir á hugmyndum ,,220
Fjarðar“ að reisa allt að 6.000 m² nýbyggingu á lóð að Strandgötu
26-30 sem tengist eldra húsnæði Fjarðar að Fjarðargötu 13-15. Ef af verður er
gert ráð fyrir að framkvæmdir hefjist á tímabilinu 2021-2023 og að afhending á
húsnæði til bæjarins til kaupa eða leigu verði á tímabilinu 2023-2026.

Sjá kynningarefni í fundargerð bæjarstjórnar 11.11.2020

^{Mismunandi útfærslur að viðbyggingu við Fjörð verslunarmiðstöð eru í skoðun.}

Breytt hlutverk
bókasafna – hönnun með þarfir notenda í huga

Það hefur legið fyrir um nokkurt skeið að endurskoða og
umbreyta húsnæði Bókasafns Hafnarfjarðar en núverandi húsnæði þykir hvorki skipulagt
né hannað með þarfir notenda í huga. Húsnæðið er á 4 hæðum og 7 pöllum
og of mikið af rými sem nýtist notendum safnsins takmarkað. Þannig þykir fjölnota salur
t.a.m. of lítill fyrir alla þá mögulegu starfsemi sem þar gæti farið fram. Árlega
koma á bókasafnið á milli 115.000 – 125.000 manns, gestir á öllum aldri.
Hafnfirðingar eiga stóra drauma um bæjarbókasafnið sitt samkvæmt könnun sem
framkvæmd var nú í sumar. Þar komu fram óskir um kaffihús, leiksvæði, þægilegar
setustofur og lengri afgreiðslutíma auk fjölbreyttari þjónustu. Nýtt húsnæði á
einni hæð byði upp á mikla möguleika til að þjóna gestum og gangandi á öllum
aldri mun betur og stærri og opnari fjölnota salur myndi nýtast vel fyrir bæði
viðskiptavini sem og starfsfólk bæjarins.

^{Fyrstu hugmyndir að nýju útliti Fjarðar verslunarmiðstöðvar.}

Spennandi fyrirmyndir
bæði hér heima og erlendis

Á nýjum bókasöfnum sem byggð hafa verið á Norðurlöndum
þ.m.t. í Helsinki, Árósum og Osló er lögð mikil áhersla á að auk góðs úrvals af
lestrar- og afþreyingarefni fyrir viðskiptavini sé hægt að fá afnot af tækjum,
tólum og aðstöðu sem eru dýr í innkaupum eins og þrívíddarprentarar og
vínylskerar, saumavélar og upptökuaðstaða. Þessar hugmyndir um framtíðarhúsnæði fyrir nýtt og
nútímalegt bókasafn í Hafnarfirði verða teknar að nýju fyrir á fundi bæjarráðs
Hafnarfjarðar fimmtudaginn 19. nóvember. Hafnfirðingar og aðrir hagsmunaaðilar
eru hvattir til að kynna sér þær hugmyndir sem liggja fyrir nú þegar og drög að
samkomulagi við „220 Fjörð“.