Ísgerð Hafnarfjarðar á Thorsplani í allt sumar

Klassískt íslenskt á Thorsplani

„Við búum allan ísinn til í Bæjarhrauni. Þar eru við með gelato-kúluís og þennan hefðbunda hvíta ís í bragðarrefi og brauðform. Við ákváðum að prófa að vera hér á Thorsplani í sumar og stefnum á að vera með opið alla daga frá 14-18,“ segir Björn Páll Fálki Valsson sem ásamt bróður sínum Grétari Þór eiga Ísgerð Hafnarfjarðar. Hann segir að leiki veðrið hins vegar við fjörðinn fagra opni turninn fyrr eða lengur.

Stórir dagar hafa verið hjá þeim bræðrum, til að mynda 17. júní og heimsókn VÆB-bræðra á Thorsplanið en þessir hefðbundu hafa einnig glatt.

„Við höfum líka prófað þegar Hjarta Hafnarfjarðar var að opna að hafa opið til rúmlega 21. En hingað kemur aðallega fólk sem röltir framhjá, sér ísbúðina og vill prófa.“ Þótt ísinn leiki aðalhlutverkið er einnig hægt að fá gos, nammi og pylsu eins og góðum söluturni sæmir.

„Já, við bjóðum þetta klassíska íslenska,“ segir Björn og brosir.

Ísgerðin er ekki gömul en byggð á eldri grunni. Þeir bræður keyptu fyrirtæki sem hét Snjóís, sem áður hafði verið Skúbb, Hafís og fleira. „Já, eitthvað sem hafði ekki gengið og það verður bara að koma í ljós hvort okkar gerir það. Maður verður að prófa.“ Sjálfur sé hann minnst í rekstrinum, Grétar sé stoðin, styttan og með reynsluna.

„Hann gerði áður ís í Perlunni, býr til ísinn okkar og sér um daglegan rekstur. Ég smakka,“ segir Bjössi. „Já, hann plataði mig í þetta,“ segir Grétar og brosir.

Ísgerðin hafnfirsk ísbúð

Bræðurnir eru frá Akureyri. Grétar býr í Vogunum en Bjössi við Hellisgerði og telur sig nú Hafnfirðing. „Ég við Helena konan mín og börnin höfum búið hér síðan 2018-9. Hvenær er maður Hafnfirðingur? Strákurinn var að koma með bikar í Kaplakrika eftir N1 mótið. Er maður þá ekki orðinn Hafnfirðingur? Barnið búið að skila bikar í Krikann!“

Ísgerð Hafnarfjarðar er með flaggskipið að Bæjarhrauni 2. Þar er ekki aðeins boðið upp á fjölbreytt úrval ísrétta heldur er þar einnig skyrbar, vegnaskálar, búst og hollustu. Ísinn má bæði fá hefðbundinn og laktósafrían  sem hentar einstaklingum með mjólkurofnæmi eða mjólkuróþol. „Svo erum við með skyrísinn, sykurlaus og laktósafrír,“ segir Grétar.

Opið út ágúst

Þeir bræður eru enn að finna út hver réttanna hefur vinninginn í vinsældum. „Við höfum aðeins starfað í þrjá mánuði og erum enn að byggja upp reynsluna,“ segir Björn. „Ég gef okkur 1-3 ár að ná athygli íbúa og kynna þeim fyrir þessari hafnfirsku ísbúð.“

Ísbúðin á Thorsplani fer ekki framhjá neinum, á miðju planinu. Þeir bræður stefna á að hún verði opin út vegan-hátíðina í ágúst. „Þá verðum við með vegan-ís í boði,“ segir hann.

„Hugmyndin með því að vera hér á Thorsplani er að leyfa fólki að kynnast okkur, smakka ísinn og fá þau svo upp í Bæjarhraun þar sem úrvalið býður þeirra.“

Já, sumarið fullkomnast með góðan ís í hönd!