Jólahús – opið fyrir umsóknir

Já, jólin nálgast óðfluga. Opnað hefur verið fyrir umsóknir í
Jólaþorp Hafnarfjarðar 2016. Sem fyrr vill Jólaþorpið fá til liðs við sig
einstaklinga, samtök og fyrirtæki sem hafa til sölu gæðavöru á góðu verði og
fjölbreytt úrval varnings með loforði um líf og jólafjör á á sölubásnum.

Í Jólaþorpinu eru 20 söluhús, skreytt einingahús sem eru 5,8
fm. að stærð. Góð aðsókn hefur verið í söluhús Jólaþorps Hafnarfjarðar síðustu
árin og því er valið úr innsendum umsóknum þar sem horft er sérstaklega til
ofangreindra þátta. Í ár opnar Jólaþorpið föstudaginn 25. nóvember og verður þá opið frá kl. 18:00 – 20:00.  Eftirleiðis verður opið alla
aðventuna á laugardögum og sunnudögum frá 12-17. Eins verður opið á
Þorláksmessu frá kl. 18-21. Leigugjald á söluhúsi er kr. 15.000.- fyrir
helgina. Innifalið í leigugjaldi er allur kostnaður við uppsetningu og rekstur
húss og þrif á svæðinu. Að auki mun Hafnarfjarðarbær sjá um að kynna Jólaþorpið
með ýmsum hætti, s.s. útvarps-, skjá og blaðaauglýsingum og laða gesti að með
skemmtidagskrá.

Söluaðilar þurfa að uppfylla lög og reglur sem um það kunna
að gilda hvað sölumuni varðar. Sé vara eða vöruflokkur skilyrtur á einhvern
hátt eða háður veitingu leyfa ber söluaðila að kynna sér það og afla viðkomandi
leyfa. Á þetta við t.d. sölu matvæla, drykkjar, áfengra drykkja og annarar vöru
sem er mögulega eftirlitsskyld. Söluaðilar eru hvattir til að kynna sér einnig
hvort og hvaða tryggingar kunni að vera hentugar eigi það við. Staðsetning
jólahúsa fer eftir heildarásýnd þorpsins og hvað hentar helst í því skyni.

Umsækjendur þurfa að skila inn umsóknum fyrir 3. nóvember 2016.
Sjá umsóknarform hér

Hægt er að senda fyrirspurnir á netfangið: jolathorp@hafnarfjordur.is

^{Ljósmynd frá Jólaþorpi Hafnarfjarðar: Guðni Gíslason}