Kristín Þorleifsdóttir 100 ára

Kristín Þorleifsdóttir 100 ára

„Trú á almættið. Maður gerir þetta ekki einn,“ svaraði Kristín Þorleifsdóttir, Didda, spurð hvernig hún náði svo háum aldri. Didda, sem er Hafnfirðingur í húð og hár, fædd hér 24. febrúar 1925, er 100 ára. Hún ólst upp á Nönnustíg 3, ein fimm barna Sigurlínar Jóhannesdóttur og Þorleifs Guðmundssonar. Fjögur náðu fullorðinsaldri.

„Til hamingju,“ sagði Valdimar Víðisson bæjarstjóri þegar hann tók í höndina á Diddu, á 100 ára afmælinu hennar og færði henni blóm fyrir hönd bæjarbúa. Það var haldið í Hásölum. Afkomendur og vinir fögnuðu með henni. Stuðið var mikið. Margrét Pálma með kór, Una Torfa og sjálf hélt hún tölu.

Giftist í seinni heimstyrjöldinni

Kristín giftist Hauki Magnússyni í síðari heimstyrjöldinni og lést hann árið 1987 eða fyrir 38 árum síðan. Þau eignuðust fimm börn og eru fjögur þeirra búsett í Hafnarfirði. Afkomendurnir eru á fimmta tug.

Didda hefur búið á Hjallabraut frá árinu 1990 og vann hún hjá systur sinni Sigrúnu, Dúnu, í Burkna eftir að börnin voru komin á legg. Hún hefur í gegnum tíðina tekið að sér mörg störf.

Gaflari sem heldur með Haukum

Didda er Haukakona og hún kemur fram í 5. þætti þáttaraðarinnar Missir sem nú er í sýningu í Sjónvarpi Símans.

Já, innilega til hamingju með aldarafmælið Didda. Við Hafnfirðingar klöppum og fögnum þessum frábæru tímamótum þínum.

Heyrum meira af Diddu og lífshlaupi hennar í texta sem börnin hennar tóku saman.

Kristín Þorleifsdóttir – fyrstu 100 árin

Kristín Þorleifsdóttir (Didda) er fædd í Hafnarfirði 24. febrúar 1925 og er Hafnfirðingur og Gaflari í húð og hár.

Kristín ólst upp á Nönnustíg 3 og voru foreldrar hennar þau Þorleifur Guðmundsson yfirverkstjóri hjá Hafnarfjarðarbæ og Sigurlín Jóhannesdóttir húsmóðir. Systkini Kristínar voru Guðmundur (Mummi), Margrét (Mæja), Sigrún (Dúna, Blómabúðinni Burkna) og Gyða, sem lést í barnæsku.

Kristín giftist Hauki Magnússyni frá Reynidal í Mýrdal 11. mars 1944. Hann var þá lögregluþjónn en starfaði lengst af sem húsasmíðameistari. Hann lést árið 1987. Þau hjónin byggðu sér hús að Tunguvegi 3 þar sem einnig var trésmíðaverkstæði Hauks. Börn þeirra eru fimm: Bjarni Hólm, Gyða, Auður, Þráinn og Hulda Mjöll. Öll búa þau í Hafnarfirði nema Hulda sem bjó lengst af í Reykjavík en nú í Mosfellsbæ. Barnabörnin eru 15 talsins og afkomendurnir alls á fimmta tug. Haukur var áhugasamur um veiði og útiveru og voru ferðalög um landið ríkur þáttur í lífi fjölskyldunnar. Gegnt heimilinu á Tunguveginum bjuggu Mæja systir Diddu ásamt Sigurði Jónssyni og börnum þeirra og var afar náið og gott samband á milli frændfólksins sem og við fjölskyldu Dúnu og Gísla Jóns Egilssonar á Merkurgötunni.

Didda með alnöfnu sinni Kristínu Þorleifsdóttur.

Samhliða því að gæta bús og barna vann Didda á stundum utan heimilis m.a. við síldarsöltun. Þegar á þurfti að halda greip hún oft í samsetningu málarastiga og fiskigogga á verkstæði Hauks. Hún hélt framleiðslunni meira að segja gangandi þegar Haukur vann um tíma  í Svíþjóð í lok sjöunda áratugar síðustu aldar þegar efnahagslífið var í lægð vegna aflabrests. Í framhaldinu dvöldust Haukur og Didda ásamt yngstu börnunum sumarlangt í Varberg í Svíþjóð. Þá gafst tækifæri til þess að ferðast um Skandinavíu.

Þegar börnin voru komin á legg hóf Didda störf hjá Dúnu systur sinni í blómabúðinni Burkna og vann þar við afgreiðslu- og bókhaldsstörf.

Árið 1990 flutti Didda í eigin íbúð á Hjallabraut 33 og hefur búið þar æ síðan. Þar hefur hún notið vináttu margra, tekið þátt í félagsstarfi og húsfélagsstjórn. Didda var virk í Kvenfélaginu Hrund sem var félagsskapur eiginkvenna iðnaðarmanna í Hafnarfirði. Þá hefur hún látið sig málefni Krabbameinsfélagsins varða en sjálf tókst hún á við krabbamein af fádæma æðruleysi þá  rétt um sextugt. Didda er afar listfeng og hefur notið þess að prjóna, hekla, hanna skartgripi og búa til verk úr gleri.

Didda er eldheitur stuðningsmaður Hauka. Hún mætti oft í góðra vinkvennahópi á heimaleiki handknattleiksliða þeirra allt fram að heimsfaraldri. Hún fylgist enn með öllum leikjum félagsins í sjónvarpi.

Didda hefur lifandi áhuga á þjóðmálum og  málefnum líðandi stundar. Hún er höfuð og hjarta stórfjölskyldunnar og lætur sér annt um allt sitt fólk. Hún nýtur samvista við það, hvenær sem færi gefst, en hefur líka samband í síma og á samfélagsmiðlum. Didda er stálminnug og  fer oft með  ljóð, vísur og sálma sem hæfa tilefni og aðstæðum hverju sinni. Skáldskap nam hún af ömmu sinni og nöfnu sem er og hefur verið hennar fyrirmynd.

Sigurlín móðir Kristínar fæddist á Gilsárteigi skammt frá Egilsstöðum en flutti 5 ára gömul til Hafnarfjarðar. Þorleifur var ættaður úr Arnarfirði en fluttist með foreldrum sínum, Guðmundi Ásgeirssyni og Kristínu Þorleifsdóttur, til Hafnarfjarðar 11 ára gamall. Þorleifur og systkini hans voru oft kennd við Hæðina sem er efst í brekkunni beggja vegna Reykavíkurvegar. Út af þeim systkinum er kominn fjöldi afkomenda sem margir eru búsettir í Firðinum. Didda hefur haldið til haga munum og minningum sem tengjast fjölskyldu hennar í Arnarfirði. Kristín amma hennar var barnabarn Margrétar Sigurðardóttur, systur Jóns (forseta) Sigurðssonar.

Didda kemur fram í þáttaröðinni Missir (5. Þætti) sem nú er í sýningu í Sjónvarpi Símans.