Landsátakið Syndum var sett í Ásvallalaug

Vatnið er vinur okkar – flæðum!   

„Vatnið er vinur okkar,“ sagði Rósa Guðbjartsdóttir bæjarstjóri  og setti átakið Syndum saman í kringum Ísland í Ásvallalaug nú í morgun.  

Íþrótta- og Ólympíusamband Íslands í samstarfi við Sundsamband Íslands stendur fyrir landsátaki í sundi frá 1. – 30. nóvember 2024. Setningarathöfn Syndum fór fram í Ásvallalaug í dag á upphafsdegi átaksins þar sem bæjarstjóri flutti meðal annars stutt ávarp áður en hópur sundgarpa frá Sundfélagi Hafnarfjarðar synti átakið táknrænt af stað. Á síðasta ári syntu þátttakendur samtals 26.862,93 km, eða rúmlega 20 hringi í kringum landið. Þar af var Ásvallalaug með flesta kílómetra synta samanlagt. 

„Margir segja meira að segja að sund sé hin fullkomna íþrótt. Að synda styrkir okkur ekki aðeins líkamlega heldur er það líka frábær leið til að auka andlega vellíðan, finna ró og ná núllstillingu,“ segir Rósa Guðbjartsdóttir bæjarstjóri.  

„Ég hvet Hafnfirðinga og alla landsmenn til að synda af stað, skrá sig til leiks og efla eigin heilsu í sundlaugum landsins. Gerum vatnið að vini okkar í nóvember“. 

Heilsu- og hvatningarátak til allra landsmanna  

Syndum er heilsu- og hvatningarátak sem höfðar til allra landsmanna. Markmiðið með Syndum er að hvetja almenning til þess að hreyfa sig oftar og meira í sínu daglega lífi og nota meðal annars sund til þess. Í fyrra voru skólar og sundfélög einnig sérstaklega hvött til þátttöku og svo verður einnig í ár.

Syndum er hluti af Íþróttaviku Evrópu sem hefur það að markmiði að kynna íþróttir og almenna hreyfingu um alla Evrópu og sporna þannig við auknu hreyfingarleysi meðal almennings. Sund er fyrir alla, óháð aldri, bakgrunni eða líkamlegu ástandi og er tilvalin þjálfunaraðferð sem styrkir hjarta- og æðakerfið, lungu og vöðva líkamans en er einnig frábær og skemmtileg tómstundaiðja sem öll fjölskyldan getur stundað saman.  

Vettvangurinn er www.syndum.is 

Allir skráðir sundmetrar þátttakenda safnast saman og verða sýnilegir á forsíðu www.syndum.is. Á síðunni er hægt að sjá hversu marga hringi landsmenn hafa synt í kringum Ísland. Á síðunni má jafnframt finna skemmtilegan fróðleik og upplýsingar um allar sundlaugar landsins.

• Til þess að taka þátt þarf að skrá sig inn á vefnum: www.syndum.is og fara í Mínar skráningar. Einfalt er að velja sér notendanafn og lykilorð og skrá synta metra. Þeir sem eiga notendanafn úr Lífshlaupinu eða Hjólað í vinnuna geta notað það til að skrá sig inn.  

Fyrir frekari upplýsingar má hafa samband í gegnum netfangið: syndum@isi.is