Röskun á skólastarfi – leiðbeiningar uppfærðar

Leiðbeiningar varðandi röskun á skólastarfi sökum veðurs hafa verið uppfærðar og í þeim er nú unnið samkvæmt viðvörunarkerfi Veðurstofu Íslands. Leiðbeiningarnar, sem gefnar hafa verið út á íslensku, ensku og pólsku , fela í sér tilmæli um viðbrögð og hlutverk foreldra/forsjáraðila barna í skólum og frístundastarfi þegar veðurviðvaranir eru gefnar út. Leiðbeiningarnar eiga við “yngri börn” þ.e. börn yngri en 12 ára. 

Slökkviliði höfuðborgarsvæðisins (SHS) hefur verið falið af sveitarfélögunum á svæðinu að
fylgjast með veðri og veðurspám og senda út tilkynningar ef á þarf að halda,
eftir atvikum í samráði við lögreglu og fræðsluyfirvöld. 

Ábyrgð foreldra / forráðamanna

Mikilvægt er að
foreldrar og forráðamenn fylgist vel með
fréttum af veðri, veðurspám og öðrum tilmælum frá yfirvöldum sem gætu haft
áhrif á skóla- og frístundastarf barna og bregðist við í samræmi við aðstæður
hverju sinni. Veðurfar og aðstæður geta verið mismunandi eftir hverfum og
breyst skjótt með ófyrirséðum hætti. Mikilvægt er að fólk fari ekki af stað til
skóla eða vinnu ef það treystir sér ekki eða er vanbúið til farar, t.d. ef
bifreið er ekki búin til vetraraksturs.

Leiðbeiningar þessar eiga við „yngri
börn“, það er börn yngri en 12 ára. Athugið að hér er aðeins um viðmið að ræða
sem er háð mati forsjáraðila.

Skóla- og
frístundastarf fellur ekki niður nema tilkynnt sé um það sérstaklega. Í upphafi
skóladags getur tafist að fullmanna skóla og mega forsjáraðilar þá búast við
því að starfsfólk leiti liðsinnis þeirra. Forsjáraðilar eru hvattir til að taka
slíkum óskum vel. Forsjáraðilar leggja ávallt sjálfir mat á það hvort fylgja
þurfi barni í eða úr skóla vegna veðurs, óháð því hvort tilkynning hafi borist
frá yfirvöldum. Meti forsjáraðilar aðstæður svo að ekki sé óhætt fyrir börn
þeirra að sækja skóla skulu þeir tilkynna skólanum um það sem lítur þá á
tilvikið sem eðlilega fjarvist. Sama gildir ef börn eða forsjáraðilar lenda í
vandræðum á leið sinni til skóla og verða frá að hverfa.