Leikskólinn Álfasteinn hlýtur Orðsporið 2026

Starfið á Álfasteini fær viðurkenningu

Leikskólinn Álfasteinn hlaut í dag Orðsporið 2026 fyrir fagmennsku, ígrundun og metnaðarfullt þróunarstarf sem byggt er á fræðilegum grunni og samvinnu.

Sigurður Sigurjónsson, formaður Félags stjórnenda leikskóla, afhenti Ingu Líndal, leikskólastjóra Álfasteins, viðurkenninguna við hátíðlega athöfn í leikskólanum nú í morgun. Valdimar Víðisson, bæjarstjóri Hafnarfjarðar, færði þeim einnig blóm og óskaði hann og Kristín Thoroddsen, formaður fræðsluráðs, þeim til hamingju fyrir hönd bæjarins.

Markviss stefna á Álfasteini

Í umsögn valnefndar Orðsporsins segir að með markvissri stefnu skólans um að hvetja starfsfólk til náms í leikskólakennarafræðum hafi skapast „sterkt faglegt umhverfi þar sem rannsóknir, starfendarannsóknir og sameiginleg ábyrgð á gæðum skólastarfs eru leiðarljós“.

Í tilkynningu Kennarasambands Íslands segir að kennararnir Helga Guðmundsdóttir og Hjördís Jónsdóttir hafi að mati valnefndar sýnt faglegt hugrekki með starfendarannsóknum; þær hafi rýnt, með kerfisbundnum hætti, í eigið starf, spurt gagnrýninna spurninga og þróað nýjar leiðir í skólastarfinu, meðal annars er kemur að aðferðum sem geta haft áhrif á tengslamyndun og samskipti við foreldra.

„Starfendarannsóknirnar hafa leitt til raunverulegra breytinga á starfsháttum. Innleiddir hafa verið tengslahringir og samskiptahringir þar sem kennarar meta tengsl sín við hvert barn fjórum sinnum á ári. Þessi kerfisbundna nálgun tryggir að ekkert barn verði jaðarsett og að gripið sé tímanlega til aðgerða ef tengsl eru veik. Með þessu hefur tekist að styrkja öryggi barna, fagvitund kennara og samvinnu innan teymanna,“ segir í umsögninni.

Mælanleg aukning á ánægju

Þá kemur fram í umsögn valnefndar að kannanir meðal foreldra sýni mælanlega aukningu á ánægju með aðlögunarferli skólans, eftir að breytingarnar voru innleiddar. Foreldrasamtöl, sem fara að jafnaði fram sex til átta vikum eftir aðlögun, hafa orðið að mikilvægu faglegu rými fyrir endurgjöf og samræður – sem eflir traust foreldra og forráðamanna til kennara og starfsfólks.

„Starf skólans sýnir hvernig markviss þróun, byggð á fræðilegum grunni og samvinnu, getur skapað varanlegan ávinning fyrir börn, foreldra og samfélagið í heild,“ segir í lok umsagnar valnefndar.

Hafnarfjarðarbær fékk Orðsporið einnig 2023

Hafnarfjarðarbær hlaut einnig viðurkenninguna árið 2023. Þá fyrir  það framsækna skref að samræma starfstíma í leikskólum og grunnskólum bæjarins og gera þannig skólaárið á þessum tveimur skólastigum sambærilegt.

Kennarasamband Íslands, Félag leikskólakennara, Félag stjórnenda leikskóla og Mennta- og barnamálaráðuneytið, Samband íslenskra sveitarfélaga og Heimili og skóli.