Lífsnauðsynlegt að tryggja fjármagn til vegaframkvæmda

Hafnarfjarðarbær ítrekar mikilvægi þess að mörkuð sé heildarstefna fyrir framkvæmdir við Reykjanesbraut innan Hafnarfjarðar, þar sem tímasetning framkvæmda er ákveðin og fjármagn tryggt. Í dag er hafin vinna við gerð mislægra gatnamóta við Krýsuvíkurveg en aðrar framkvæmdir eru ekki komnar í undirbúning. 

Minnisblað vegna samgöngumála var lagt fram á fundi bæjarstjórnar Hafnarfjarðar í gær og lagði bæjarstjórn í framhaldinu fram bókun þar sem skorað er á alþingismenn kjördæmisins að tryggja að fjármagn fáist á fjárlögum 2018 og árunum þar á eftir til að ljúka framkvæmdum við Reykjanesbraut innan Hafnarfjarðar. Óskað er eftir viðræðum við ráðherra og alþingismenn hið fyrsta vegna þessa brýna öryggis- og hagsmunamáls.  

Breikkun á Reykjanesbraut og endurnýjun gatnamóta ekki á áætlunum ríkisins

Samkvæmt vegaáætlun eru framkvæmdir við Reykjanesbraut frá Vogum að Kaldárselsvegi  hugsaðar á árunum 2015-2022 en breikkun á Reykjanesbraut frá Kaldárselsvegi að Álftanesvegi ekki að sjá á áætlunum ríkisins. Þegar heildarfjármagn til vegaframkvæmda á höfuðborgarsvæðinu er skoðað er ljóst að framkvæmdir þar hafa verið af mjög skornum skammti undanfarin ár. Þar hefur Hafnarfjörður setið eftir þrátt fyrir að tölur yfir umferðarþunga sýni m.a. að umferðarmagn við Setberg í Hafnarfirði er að nálgast mjög umferðarmagn í Ártúnsbrekku per akrein. Umferðin við Setberg fer öll um eitt hringtorg með tveimur akreinum og um það fara að meðaltali 47.300 bílar á dag. Íbúar eru í auknum mæli búnir að gefast upp á notkun hringtorgsins og hefur það leitt af sér aukinn og óæskilegan umferðarþunga og hraða innan íbúðahverfa. Brýnt er að tryggja umferðaröryggi á þessum kafla frá Krýsuvíkurvegi að Álftanesvegi.

Hlíðartorg var hugsað sem bráðabirgðalausn fyrir tæpum 15 árum síðan 

Mikil þörf er á að endurnýja gatnamótin við Kaplakrika sem og við Lækjargötu og sýna tölur yfir slysatíðni og umferðarþunga glöggt að þau eru löngu sprungin. Hringtorgið við Lækjargötu/Setberg, Hlíðartorg, var hugsað sem bráðabirgðalausn á sínum tíma og þá strax ljóst að það myndi ekki anna umferð. Bæði gatnamótin eru í 5 og 6 sæti yfir slysamestu gatnamót í þéttbýli á Íslandi í ársskýrslu slysaskráningar Samgöngustofu 2015 og í 1 og 2 sæti þegar slysamestu hringtorgin á höfuðborgarsvæðinu eru skoðuð.  Á 3,5 kílómetra vegakafla frá Kaldárselsvegi að Krýsuvíkurvegi voru slysin rúmlega 100 talsins árið 2015 sem gefur gildið 28 slys á hvern kílómeter. Samhliða vaxandi fjölda ferðamanna í umferðinni hefur íbúum Hafnarfjarðar fjölgað sem og starfsmönnum í stækkandi íbúa- og atvinnubyggð Vallahverfis. Þessar staðreyndir kalla á tvöföldun Reykjanesbrautar í gegnum bæinn áður en fleiri alvarleg slys verða.  

Greinargerð er að finna í fundargerð bæjarstjórnarfundar – sjá lið 7