Lífshlaupið hefst 5. febrúar – allir með í landskeppni í hreyfingu

Skráning í Lífshlaupið 2020 er í fullum gangi!  Við hvetjum alla hafnfirska vinnustaði, Hafnfirðinga og vini Hafnarfjarðar til að taka virkan þátt. Sköpum heilsueflandi og skemmtilega stemningu saman í febrúar!

Lífshlaupið er heilsu- og hvatningarverkefni Íþrótta- og
Ólympíusambands Íslands sem höfðar til allra landsmanna. Markmið þess er að
hvetja landsmenn til þess að fara eftir ráðleggingum embættis landlæknis um
hreyfingu hvort sem er í frítíma, vinnu, skóla eða við val á ferðamáta. Í
ráðleggingunum segir að börn og unglingar ættu að hreyfa sig í minnst 60
mínútur daglega og fullorðnir ættu að stunda miðlungserfiða hreyfingu í minnst
30 mínútur daglega.

Lífshlaupið er ótrúlega
skemmtilegur og góður vettvangur fyrir þá sem vilja byrja að hreyfa sig eða
hreyfa sig nú þegar reglulega og vilja skrá hreyfinguna markvisst, hafa yfirlit
og setja sér markmið. En auk þess að hvetja til hreyfingar daglega þá skapar
verkefnið skemmtilega stemningu á vinnustöðum og í skólum sem keppa sína á
milli og innanhúss. Aðalmarkmiðið er að fá sem flesta til að hreyfa sig sem
oftast á meðan á keppninni stendur. Fullorðnir að lágmarki 30 mínútur á dag og
börn og unglingar að lágmarki 60 mínútur á dag.

Lífshlaupið skiptist í fjóra keppnisflokka:

• vinnustaðakeppni frá 5. febrúar – 25. febrúar, fyrir 16 ára og
  eldri (þrjár vikur)
• framhaldsskólakeppni frá 5. febrúar – 18. febrúar, fyrir 16 ára og
  eldri (tvær vikur)
• grunnskólakeppni frá 5. febrúar – 18. febrúar, fyrir 15 ára og
  yngri (tvær vikur)
• einstaklingskeppni þar sem hver og einn getur
  skráð inn sína hreyfingu allt árið

Eins og
ávallt eru allir landsmenn hvattir til þess að taka þátt í Lífshlaupinu og skapa
skemmtilega stemningu og auka félagsandann á vinnustaðnum/í skólanum. Skráningarferlið er einfalt og þægilegt en fínar leiðbeiningar má finna hér https://lifshlaupid.is/keppnir/ og
undir viðeigandi keppni vinstra megin. Nánari upplýsingar um Lífshlaupið og skráningu gefur
Hrönn Guðmundsdóttir sviðsstjóri Almenningsíþróttasviðs ÍSÍ, á hronn@isi.is eða í síma: 514-4000.