Litlu og stóru leikskólatrén á Thorsplani

Fimm ára börn skreyta trén í Jólaþorpinu

Kát og glöð fimm ára leiskólabörn Smáralundar komu í Jólabæinn þennan mánudagsmorgun og skreyttu Cuxhaven-jólatréð. Þrír leikskólar skreyta tréð með sérhönnuðu jólaskrauti sínu þetta árin. Hver leikskóli á sitt tré í Jólaþorpinu sem börnin skreyta.

Jólabærinn Hafnarfjörður heldur í fallegar hefðir sem skapast afa í aðdraganda jóla. Ein af þeim eru þessar jólaskreytingar elstu leikskólabarna á Thorsplani. Um árabil hafa leikskólar í Hafnarfirði séð um að skreyta litlu jólatrén sem prýða Jólaþorpið á Thorsplani. Skrautið er afar kærkomið og hefur sett skemmtilegan svip á Jólaþorpið frá upphafi. Þegar má sjá skreytt tré og önnur sem bíða þess að fá skrautið góða.

Skapandi og skemmtilegir leikskólakrakkar 

Já, jólatrén í Jólaþorpinu eru mörg. Nú stendur eitt á sviðinu í jólaþorpinu og tilvalið að dansa í kringum það. Börnin fá þá frábært útsýni yfir gullfallegt jólaþorpið, sem tók breytingu þetta árið með hringhúsi í miðju þorpinu.

Það er ævintýri fyrir börnin að kíkja í Jólaþorpið. Ljósin gleðja. Skrautið er unnið úr endurvinnanlegum efnum og er af ýmsum toga og hugvitssemin allsráðandi. Við hvetjum Hafnfirðinga og vini Hafnarfjarðar til að fara í skoðunarferð um Thorsplan, skoða skrautið og jafnvel fá hugmyndir að skrauti sem hægt er að föndra heima á aðventunni með litlum tilkostnaði en mikilli gleði.